అభిమానులు, బంధుమిత్రులంతా ఆసక్తిగా ఎదురు చూస్తోన్న నిక్ జోనాస — ప్రియాంక చోప్రా వివాహ మహోత్సవం అంగరంగ వైభవంగా జరిగింది. ప్రముఖ డిజైనర్‌ రాల్ఫ్‌ లౌరెన్‌ డిజైన్‌ చేసిన పెళ్లి గౌనులో నూతన వధువు ప్రియాంక చిరుదరహాసంతో.. సిగ్గుల మొగ్గవుతూ వేదిక వద్దకు రాగా.. వరుడు నిక్ జోనాస్‌, ప్రియురాలు చేతిని అందుకోగా ఏడేడు జన్మలకు మనం ఒకరికొకరం తోడు జీసస్‌ సాక్షిగా పెళ్లి ఉంగరాలను మార్చుకున్నారు. క్రైస్తవ సంప్రదాయం ప్రకారం నిక్ జోనాల్‌ - ప్రియాంకల పెళ్లి తంతు పూర్తయ్యింది.
రాజస్థాన్‌, జోధ్‌ పూర్‌ లోని ఓ ప్యాలెస్ లో బాలీవుడ్ బ్యూటీ ప్రియాంకా చోప్రా, నిక్ జొనాస్ ల వివాహ వేడుకలు అత్యంత వైభవంగా సాగాయి. బెంగళూరు నుంచి వచ్చిన చంద్రశేఖర్ శర్మ ఆధ్వర్యంలోని 11 మంది పండితులు భారతీయ సాంప్రదాయ పద్దతిలో వివాహాన్ని జరిపించారు. పెళ్లి వేడుకకు ముందు ప్యాలెస్ లోనే వరుని ఊరేగింపు జరుగగా, వరుని చెప్పులను దాచిపెట్టే వేడుక జరిగింది. ఈ సందర్భంగా అతిథులంతా సంప్రదాయ దుస్తులు ధరించారు. వధువు తరపున మధు చోప్రా ఆధ్వర్యంలో వరుని బంధువులకు స్వాగత సత్కారం జరిగింది.
పెళ్లి వేడుకల్లో భాగంగా ప్రియాంక కజిన్, మరో నటి పరిణీతి చోప్రా, నిక్ చెప్పులను కాజేసి 5 లక్షల డాలర్లను (సుమారు రూ. 3 కోట్లకు పైగానే) డిమాండ్ చేసినట్టు తెలుస్తోంది. అయితే నిక్ ఎంత మొత్తం ఇచ్చాడన్నది తెలియరాలేదు. కాగా వివాహానికి హాజరైన అతిధులకు ఫుడ్ సర్వ్ చేసేందుకు 50 మంది షెఫ్‌లు పనిచేశారు. వీరికి తోడు నిక్ కువైట్, దుబాయ్ నుంచి తమ పర్సనల్ షెప్‌లను రప్పించారు. అలాగే వధూవరుల మేకప్ కోసం 15 మంది బ్యూటీ ఎక్స్‌పర్ట్స్ పని చేశారు.
