ఎన్టీఆర్ బయోపిక్ నందమూరి బాలకృష్ణ తీస్తానని ప్రకటించినప్పుడు దర్శకుడిగా తేజాను అనుకున్న సంగతి తెలిసిందే. కొంత కథా చర్చల అనంతరం తేజా దర్శకుడిగా సినిమా షూటింగ్ అట్టహాసంగా ప్రారంభమైంది కూడా. ఆ వేడుకకు సినీలోకమంతా తరలివచ్చింది.
కానీ ఉన్నపళంగా ఎందుకో తేజాను ఆ ప్రాజెక్టు నుంచి తప్పించారు... లేదు..లేదు.. తానే ఈ భారం మోయలేనని తేజాయే తప్పుకున్నాడని బాలయ్య టీమ్ చెప్పుకొచ్చింది. మొత్తానికి క్రిష్ దర్శకత్వంలో మళ్లీ ప్రాజెక్టు కదిలింది. గతంలో క్రిష్ తీసిన చిత్రాల ఆధారంగా ఈ సినిమా చాలా బాగా వస్తుందని అంతా అనుకున్నారు.
కానీ అనూహ్యంగా.. అన్ని హంగులూ ఉన్నా.. ఎన్టీఆర్ బయోపిక్ అట్టర్ ఫ్లాప్ అయ్యింది. సెకండ్ పార్ట్ మహానాయకుడు అయితే బాలయ్య హిస్టరీలోనే అత్యంత చెత్త వసూళ్లు సాధించిన చిత్రంగా నిలుస్తోంది కూడా. ఈ సమయంలో తేజా తీసుకున్న నిర్ణయంపై చర్చ మొదలైంది.
కథను ఇష్టం వచ్చినట్టు మార్చడమే.. ఈ రెండు సినిమాల పరాజయానికి కారణంగా విశ్లేషకులు భావిస్తున్నారు. ఇలాంటి అడ్డగోలు మార్పులకు తేజా తలొగ్గకపోవడం వల్లే అతన్ని తప్పించారని ఇప్పుడు భావిస్తున్నారు. మొత్తానికి తేజా ఈ ప్రాజెక్టు నుంచి తప్పించుకుని మంచి పనే చేశాడని ఆయన శ్రేయోభిలాషులు అంటున్నారు. పాపం క్రిష్ మాత్రం ఇరుక్కుపోయాడని సానుభూతి తెలుపుతున్నారు.
