ఈ మద్య అతి తక్కువ కాలంలోనే సోషల్ మీడియాలో పాపులారిటీ సంపాదించిన వారిలో డ్యాన్సింగ్ అంకుల్ ఒకరు. ఓ పెళ్లి పార్టీలో గోవిందా స్టయిల్ డ్యాన్స్ వేసి అదరగొట్టారు. అప్పట్లో సోషల్ మీడియాలో ఈయన గురించే కదా చర్చ. బాలీవుడ్ లో ఎంతో మంది సెలబ్రెటీలు ఈయనను ప్రత్యేకంగా కలుసుకొని అభినందించారు. ఆయన్ను ముద్దుగా డబ్బు ది డ్యాన్సర్ అని కూడా పిలుస్తారు కదా. ఆయన పేరు సంజీవ్ శ్రీవాత్సవ. ఆయనది మధ్యప్రదేశ్. ప్రొపెసర్ గా పనిచేస్తున్న ఆయన చిన్న నాటి నుంచి డ్యాన్స్ అంటే ఎంతో ఇష్టమట.
ముఖ్యంగా గోవింద సినిమాలు..ఆయన యాక్టింగ్, డ్యాన్స్ అంటే ఎంతో ఇష్టమట. ఇప్పటివరకు సినీ గీతాలకు డ్యాన్స్ చేసి విపరీతమైన ఫ్యాన్ ఫాలోయింగ్ సొంతం చేసుకున్న శ్రీవాస్తవ ఇప్పుడు తనపైనే చిత్రీకరించిన ఆల్బం సాంగ్ కు అదిరిపోయే రేంజ్ లో నర్తించారు. యూఏఈలో ఉండే మ్యూజిక్ కంపోజర్ జాసిమ్, భారతీయ గాయకుడు బెన్నీ దయాళ్ సంయుక్తంగా రూపొందించిన చాచా నాచ్ అనే పాటలో ఈ డ్యాన్సింగ్ అంకుల్ అద్భుతమైన డ్యాన్స్ పెర్ఫామ్ చేశారు.
ఈ కాన్సెప్ట్ ఓరియెంటెడ్ సాంగ్ లో సంజీవ్ శ్రీవాస్తవ డ్యాన్స్ టాలెంట్ పీక్స్ లో కనిపించింది. చాచా నాచ్ అనేది.. ప్రపంచంలోని అంకుల్స్ అందరూ కనిపెట్టిన తక్కువ స్థాయి ఇండియన్ డ్యాన్స్ అంటూ ఆ వీడియోకు క్యాప్సన్ కూడా ఇచ్చారు. హేయ్. అంకుల్ మళ్లీ వచ్చేశారు.. తన డ్యాన్స్ మూమెంట్స్తో చంపేస్తున్నారు.. అంటూ నెటిజన్లు ఆ వీడియోపై కామెంట్లు చేస్తున్నారు.