తెలుగు ఇండస్ట్రీలో ఇప్పటి వరకు ఎంతో మంది ప్రేమ వివాహం చేసుకున్నారు. అలాంటి జంటలో ఒకరు జీవిత-రాజశేఖర్. ఇండస్ట్రీకి వచ్చిన కొత్తలో డాక్టర్ రాజశేఖర్ విలన్ గా పరిచయం అయ్యారు. ఆ తర్వాత అంకుశం, ఆహుతి చిత్రాల్లో హీరోగా నటించి మంచి గుర్తింపు తెచ్చుకున్నారు. ఆ చిత్రాల్లో తన సహనటి అయిన జీవితను రియల్ లైఫ్ లో ప్రేమించి పెళ్లి చేసుకున్నారు.
వీరికి శివాత్మిక, శివాన కూతుళ్లు ఉన్నారు. అయితే తమ పెద్ద కూతురైన శివాత్మికను హీరోయిన్ గా వెండి తెరకు పరిచయం చేయాలనే ఉద్దేశ్యంతో ఉన్న నేపథ్యంలో వెంకట్ దర్శకత్వంలో '2 స్టేట్స్' చిత్రం ద్వారా శివాత్మికను పరిచయం చేయడానికి గ్రీన్ సిగ్నల్ ఇచ్చేశారు. ఈ చిత్రంలో అడవి శేషు హీరోగా నటిస్తున్నట్లు వార్తలు కూడా వచ్చాయి. అయితే దర్శకుడు వెంకట్ కు .. అడివి శేష్ కి మధ్య తలెత్తిన విభేదాల కారణంగా ఈ సినిమా షూటింగు ఆగిపోయింది.
మొదటి చిత్రం ఇలా బ్రేక్ పడటం జీవిత - రాజశేఖర్ జంటను కలవరపరిచింది. ఎలాగైనా ఈ చిత్రాన్ని పూర్తిచేసి ప్రేక్షకుల ముందుకు తీసుకురావాలనే నిర్ణయానికి జీవిత - రాజశేఖర్ వచ్చారట. గతంలో జీవితకు దర్శకత్వం వహించిన అనుభవం ఉంది. అందులోనూ '2 స్టేట్స్' రీమేక్ కావడం వలన పెద్దగా సమస్య ఉండదు. ప్రస్తుతం ఎన్నికల హడావుడి ఉండటంతో అవి పూర్తయిన తర్వాత తన కూతురు కోసం జీవిత రంగంలోకి దిగనున్నట్లు టాలీవుడ్ వర్గాల్లో టాక్.