టాలీవుడ్ లో గత కొంత కాలంగా మూవీ ఆర్టిస్ట్స్ అసోసియేషన్ (మా)లో గొడవలు జరుగుతూనే ఉన్నాయి. ముఖ్యంగా ఎన్నికల సమయంలో ఈ గొడవలు తారా స్థాయికి చేరుకోవడం మీడియా సాక్షిగా ఒకరిపై ఒకరు ఆరోపణలు చేసుకోవడం..తిట్టుకోవడం జరుగుతూనే ఉంది. ఇటీవల శివాజీరాజా వర్సెస్ సీనియర్ నరేష్ ల మద్య జరిగిన మాటల యుద్దం మీడియాలో టాం టాం అయ్యింది.
ఇరు పక్షాల ప్యానెల్ వారు గతాన్ని తవ్వుకొని దారుణంగా ఒకరిపై ఒకరు దూషణలకు దిగారు. మొత్తానికి మా అసోసియేషన్ ఎన్నికల్లో సీనియర్ నరేష్ అండ్ కో గెలిచింది. ఈ నేపథ్యంలో శివాజీరాజా పై నరేష్ సంచలన వ్యాఖ్యలు చేయడం..దానికి శివాజీరాజా కౌంటర్ ఇవ్వడం జరిగింది. తాజాగా మూవీ ఆర్టిస్ట్స్ అసోసియేషన్ (మా)లో గొడవలు తీవ్రతరమవుతున్నాయి.
అసోసియేషన్ ఎన్నికలు జరిగి... సభ్యులు ప్రమాణస్వీకారం చేసిన రోజుల వ్యవధిలోనే గొడవలు మరింత ముదిరాయి. తాజాగా ఉపాధ్యక్షుడైన సీనియర్ డైరెక్టర్ ఎస్వీ కృష్ణారెడ్డి తన పదవికి రాజీనామా చేశారు. నిధుల దుర్వినియోగమే ఆయన రాజీనామాకు కారణమని తెలుస్తోంది. మరోవైపు, అసోసియేషన్ లో వివాదాలు సినీవర్గాల్లో చర్చనీయాంశమయ్యాయి.