టాలీవుడ్ లో పాత తరం స్టార్ హీరోయిన్లు ఎవరంటే వెంటనే చెబుతారు సావిత్రి, జమున, అంజలి ఇలా కొంత మంది నటీమణుల పేర్లు. ఎన్టీఆర్, ఏఎన్ఆర్ ల హిట్ సినిమాల్లో సావిత్రి కి ఎంత పేరు వచ్చిందో జమునకు కూడా అంతే పేరు వచ్చింది. అయితే ఒకప్పుడు జమునకు స్టార్ హీరోలకు మద్య విభేదాలు తలెత్తాయని..కొంత కాలం తర్వాత అవి సమసిపోయాయని వార్తలు వచ్చాయి. ఏది ఏమైనా జమున నటించిన సినిమాలకు ఇప్పటికీ మంచి ఆదరణ లభిస్తుంది. చాలా కాలం క్రితం జమున వెండి తెరపై నటించడం మానేశారు.
తాజాగా ఇప్పుడు బయోపిక్ సినిమాలు తీస్తున్న నేపథ్యంలో 'దేవినేని నెహ్రు' బయోపిక్ ను రూపొందిస్తున్నారు. 'దేవినేని' అనే టైటిల్ ను ఖరారు చేసి, 'బెజవాడ సింహం' అనే ట్యాగ్ లైన్ పెట్టారు. శివనాగు దర్శకత్వం లొ నందమూరి తారక రత్న హీరోగా నటిస్తున్నాడు. ఈ సినిమాలో అలనాటి అందాల తార జమున రీ ఎంట్రీ ఇవ్వ బోతున్నారు. దాదాపు ముప్పయి సంవత్సరాల క్రితం ఆమె సినిమాలకు దూరం అయ్యారు. ఎన్నో సార్లు ఎంతో మంది దర్శక, నిర్మాతలు తమ సినిమాల్లో నటించమని జమునను కోరినా ఆమె ఒప్పుకోలేదు. తాజాగా ఈ సినిమా షూటింగ్ ముహూర్తం జరుపుకుంది.
ఈ సందర్భంగా జమున మాట్లాడుతూ.. దర్శకుడు శివనాగు నాకు దత్తపుత్రుడు లాంటివాడు. ఈ సినిమాలో నేను తప్పకుండా చేయవలసిందేనని ఆయన పట్టుబట్టడంతో కాదనలేకపోయాను. అతని మంచి తనం.. క్రమశిక్షణ నేను ఈ సినిమా ఒప్పుకోవడానికి మరో కారణం. 30 యేళ్ల తరువాత మళ్లీ నాతో మేకప్ వేయించిన ఘనత శివనాగుకే చెందుతుంది. ప్రధానమైన పాత్రను పోషిస్తున్న తారకరత్నకు మంచి పేరు రావాలని కోరుకుంటున్నాను అని చెప్పుకొచ్చారు.