`కేజీఎఫ్ చాప్టర్- 1` ఇటీవల విడుదల అయ్యి సంచలనం సృష్టించింది. దక్షిణాది సినిమా రంగంలో కన్నడం హిందీ తమిళ తెలుగు భాషలలో విడుదలైన ఈ సినిమా అద్భుతమైన కలెక్షన్ల సునామీ సృష్టించడంతో పాటు బాక్సాఫీస్ దగ్గర బీభత్సమైన కలెక్షన్లు రాబట్టింది. ఇదిలా ఉండగా ప్రస్తుతం ఈ సినిమాకి సీక్వెల్ చేస్తున్న నేపథ్యంలో కేజీఎఫ్ ఛాప్టర్ 2 సినిమా షూటింగ్ చాలా శరవేగంగా సాగుతోంది.
ఈ క్రమంలో ఇటీవల ఈ సినిమాకి సంబంధించిన షూటింగ్ వివరాలు చిత్రయూనిట్ తెలియజేసింది. బయటకు వచ్చిన వివరాలను బట్టి చూస్తే ప్రస్తుతం ఈ సినిమా షూటింగ్ బెంగళూరులో సాగుతుండగా మరికొద్ది రోజుల్లో మైసూర్ లో ఆ తర్వాత రామోజీ ఫిలిం సిటీ లో షూటింగ్ జరుపుకోనున్నట్లు చివరాఖరుగా కర్ణాటక రాష్ట్రంలో ఉన్న బళ్లారిలో భారీ షెడ్యూల్ ఉండనున్నట్లు తెలియజేశారు.
అంతేకాకుండా ఇప్పటికే షూటింగ్ దాదాపు 80-90శాతం అప్పటికి పూర్తవుతుంది అని కేజీఎఫ్ టీమ్ అధికారికంగా ప్రకటించింది. చాప్టర్ 2లో బాలీవుడ్ స్టార్ హీరో సంజయ్ దత్.. సీనియర్ కథానాయిక రవీనా టాండన్ కీలక పాత్రలు పోషిస్తున్నారు. ఈ సీక్వెల్ లో తొలి భాగాన్ని మించి భారీ యాక్షన్ ని చూపించనున్నామని దర్శకుడు ప్రశాంత్ నీల్.. యశ్ ఇదివరకూ వెళ్లడించారు. అంతేకాకుండా రెండవ భాగంలో భారీ ఫైట్లు ఉండనున్నట్లు చిత్ర యూనిట్ తెలిపింది.