తాజాగా వెలువడిన ఆంధ్రప్రదేశ్ అసెంబ్లీ ఎన్నికల ఫలితాల్లో జనసేన పార్టీ 175 స్థానాలకు గాను జనసేన కూటమి కేవలం ఒక్క సీటు మాత్రమే గెలుచుకున్న సంగతి తెలిసిందే. జనసేన అధినేత పవన్ కళ్యాణ్ తాను పోటీచేసిన రెండు స్థానాల్లోనూ (భీమవరం, గాజువాక) ఓడిపోయారు. అయితే, నరసాపురం లోక్‌సభ స్థానం నుంచి పోటీచేసి ఓడిపోయిన నాగబాబు. జనసేన పరాజయంపై, జగన్ గురించి, జనసేన పార్టీ ఫ్యూచర్ ప్లన్స్ గురించి స్పందించారు. ‘మై ఛానల్ నా ఇష్టం’ పేరుతో తన అభిప్రాయాలను యూట్యూబ్‌లో నాగబాబు వెల్లడిస్తోన్న సంగతి తెలిసిందే.
ఎన్నికల్లో అఖండ విజయం సాధించిన వైసీపీ అధినేత వై.యస్.జగన్‌మోహన్ రెడ్డికి నాగబాబు అభినందనలు తెలిపారు. ఏపీ ప్రజలకు సుపరిపాలన అందించాలని కోరారు. తమ సహకారం జగన్‌కు ఎప్పుడూ ఉంటుందని తెలిపారు. ఇంత భారీ మెజారిటీ ఇచ్చినందుకు ప్రజలకు జగన్ రుణపడి ఉన్నారని తాను అనుకుంటున్నట్లు నాగబాబు చెప్పారు. నవరత్నాలు కాన్సెప్ట్‌ను, ఇచ్చిన హామీలను ఈ ఐదేళ్లలో చేసి చూపించాలని, ఆ నమ్మకాన్ని నిలబెట్టుకోవాలని అన్నారు. ఈ హామీలను నిలబెట్టుకునేలా తాము కూడా తమ వంతు ప్రయత్నం చేస్తామని అన్నారు.
ఇక జనసేన పార్టీ కార్యకర్తలను ఉద్దేశించి మాట్లాడుతూ ‘జనసైనికులందరికీ హృదయపూర్వక కృతజ్ఞతలు. క్లీన్ పాలిటిక్స్‌ అంటూ ముందుకొచ్చాం. మా నాయకుడు పవన్ కళ్యాణ్, నేను, నాతో పాటు అనేక మందిమి ప్రజలకు డబ్బులు పంచకుండా ముందుకు రాగలిగాం. మనకంటూ కొన్ని లక్షల ఓట్లు వచ్చాయి. అంటే లక్షలాది మంది ప్రజలు క్లీన్ పాలిటిక్స్‌ని కోరుకుంటున్నారు. మార్పు కోరుతున్నారు. అలా మార్పు కోరుకునే ప్రజలందరికీ హృదయపూర్వక కృతజ్ఞతలు జనసేన తరఫున. డబ్బులు ఆశించకుండా కేవలం పవన్ కళ్యాణ్‌పై అభిమానం, ప్రేమతో, ఒక మంచి మార్పు తీసుకొస్తాడనే నమ్మకంతో మీరంతా ఓట్లేశారు. జనసేన గెలవలేకపోచ్చు.. నైతికంగా మాత్రం మనం గెలిచాం. ఇంకా మంచి మార్పు తీసుకొద్దాం’ అని అన్నారు.
జనసైనికులు, వీర మహిళలు జనసేనను ముందుండి నడిపించారని, అయితే ఫలితాలు చూసి వీరంతా చాలా భావోద్వేగాలకు గురయ్యారని నాగబాబు చెప్పారు. జనసేన ఓడిపోయినందుకు బాధపడలేదు అంటే అబద్ధం అవుతుందని, తామంతా బాధపడ్డామని నాగబాబు వెల్లడించారు. ‘వీర మహిళల బాధ చూసి నాకు నిజంగా బాధేసింది. ఈ పరాజయం శాశ్వతం కాదు. విరామం మాత్రమే. మన సేవను ఇలానే కొనసాగిద్దాం. ఇంకా గొప్పగా ప్రజాసేవ చేద్దాం. ఒక నెల పాటు రిలాక్స్ అవ్వండి. జనసైనికులు, వీర మహిళలు మీ మీ భార్యలు, భర్తలతో కలిసి సరదాగా వెకేషన్స్‌కి వెళ్లండి. మీ ఒత్తిడిని మీ శరీరంలో నుంచి తీసేయండి. ఈలోగా మన నాయకుడు కార్యచరణ రూపొందిస్తాడు’ అని నాగబాబు సలహా ఇచ్చారు.
యూట్యూబ్ లింక్ : https://www.youtube.com/channel/UCZSzyRbn5EUrZ1OfbtBevGQ
