సినిమా, క్రికెట్.. ఈ రెండు రంగాలదీ విడదీయరాని సంబంధం. ఈ రెండు క్రేజీ రంగాలకు విశేష ఆదరణ ఉండటంతో ఒకదానితో ప్రపంచంలో ఎన్ని ఉన్నా.. ఎక్కువగా అట్రాక్ట్ అయ్యేది సినిమా, క్రికెట్‌ల వైపే. అందుకే క్రికెట్, సినిమాకి సంబంధించిన ఈ ఇష్యూ అయినా క్షణాల్లో వైరల్ అవుతుంటుంది. ఇక క్రికెటర్లతో హీరోయిన్స్ ఎఫైర్స్ అయితే ప్రత్యేకించి చెప్పాల్సిన అవసరం లేదు. హీరోయిన్లు, క్రికెట‌ర్ల మధ్య ప్రేమాయణం ఈనాటిదికాదు.....నాటి ప‌టౌడీ, ష‌ర్మిలా ఠాగూర్ నుంచి నేటి విరాట్ కోహ్లీ, అనుష్క‌శ‌ర్మ దాకా ఎంద‌రో క్రికెటర్లు హీరోయిన్ల‌తో ప్రేమాయణం సాగించారు. ఈ లిస్ట్‌లో సౌరభ్ గంగూలీ, జడేజా, ధోనీ, రైనా, కేఎల్ రాహుల్, పాండ్యా ఇలా చాలా మంది క్రికెటర్లు హీరోయిన్స్‌తో ప్రేమాయణం సాగించినట్టుగా చాలా వార్తలు వచ్చాయి.. వస్తూనే ఉంటాయి. తాజాగా ఈ లిస్ట్‌లో చేరారు భారత యువ ఫాస్ట్ బౌలర్ బూమ్రా.
ప్రస్తుతం 2019 వరల్డ్ కప్‌లో తన పదునైన బంతులతో ప్రత్యర్థులకు చుక్కలు చూపిస్తూ క్లీన్ బౌల్డ్ చేస్తున్న బూమ్రా.. మలయాళ బ్యూటీ అనుపమ పరమేశ్వరన్ ఓరచూపులకు క్లీన్ బౌల్డ్ అయ్యాడంటూ సోషల్ మీడియాలో రూమర్స్ హల్ చల్ చేస్తున్నాయి.
ప్రేమమ్ చిత్రంతో కుర్రహృదయాలను కొల్లగొట్టిన అనుపమ.. అఆ, శతమానం భవతి, క్రిష్ణార్జున యుద్ధం, తేజ్ ఐ లవ్ యు తదితర చిత్రాలతో తెలుగు ప్రేక్షకులకు చేరువైంది. తాజాగా ఈ బ్యూటీ.. జస్‌ప్రిత్ బుమ్రాతో లవ్ ట్రాక్ నడుపుతుందంటూ సోషల్ మీడియాలో చర్చ నడుస్తోంది. దీనికి కారణం బూమ్రా.. అనుపమ ఇన్‌స్టాగ్రామ్‌ని బూమ్రా ఫాలో కావడంతో పాటు.. ఒకరి పోస్ట్‌లను ఒకరు షేర్ చేసుకుని లైక్స్ చేస్తుండటంతో ఇద్దరి మధ్య సంథింగ్.. సంథింగ్ నడుస్తుందంటూ ప్రచారం ఊపందుకుంది.
ఇక ఈ రూమర్స్ అనుపమ సోషల్ మీడియా వాల్‌ని చేరడంతో సీరియస్‌గా రియాక్ట్ అయ్యారామె. లవ్వూ లేదు గివ్వూ లేదు.. ఇలాంటి రూమర్స్ ఎందుకు పుట్టిస్తారో అర్ధం కాదు. బూమ్రా నాకు మంచి స్నేహితుడు మాత్రమే అంటూ క్లారిటీ ఇచ్చింది అనుపమ పరమేశ్వరన్. గతంలో రాశిఖన్నా కూడా బూమ్రా ప్రేమలో ఉందంటూ పుకార్లు షికారు చేసిన విషయం తెలిసిందే.
