తమిళ స్టార్ హీరో చియాన్ విక్రమ్ తన కొడుకు ధృవ్‌ను లాంచ్ చేయడానికి తెలుగు బ్లాక్ బస్టర్ ‘అర్జున్ రెడ్డి’ని ఎంపిక చేసుకున్న సంగతి తెలిసిందే. ఈ సినిమాను తమిళంలో రీమేక్ చేస్తూ తన సినీ వారసుడిని ప్రేక్షకులకు పరిచయం చేస్తున్నారు. వాస్తవానికి ఈ సినిమాను ‘వర్మ’ పేరిట తొలుత చిత్రీకరించారు. ప్రముఖ దర్శకుడు బాలా దీనికి దర్శకత్వం వహించారు. అయితే, బాలా చిత్రీకరించిన విధానం బాగాలేదంటూ ఆ సినిమాను చివరి దశలో ఆపేశారు. క్రియేటివ్ ఫ్రీడమ్ లేకపోవడం వల్ల తాను సినిమాను నుంచి తప్పుకున్నట్లు బాలా కూడా ప్రకటించారు. 


మొత్తానికి ఈ సినిమా టైటిల్‌ను ‘ఆదిత్య వర్మ’గా మార్చి గిరీశాయా అనే దర్శకుడిని రంగంలోకి దించారు. బాలా చిత్రీకరించిన మొత్తాన్ని చెత్తబుట్టలో వేసి మళ్లీ సినిమా షూటింగ్‌ను ఫ్రెష్‌గా మొదలుపెట్టారు. ప్రస్తుతం చిత్రీకరణ కొనసాగుతోంది. 


ఈ నేపథ్యంలో తాజాగా ‘ఆదిత్య వర్మ’ ఫస్ట్ లుక్‌ను విడుదల చేశారు. ఈ సినిమాలోని ధృవ్‌ రెండు లుక్స్‌ను ఫస్ట్ లుక్ పోస్టర్‌లో చూపించారు. ఓవైపు గుబురు గెడ్డంతో సిగరెట్ తాగుతూ ఉన్న ఆదిత్య వర్మ.. మరోవైపు క్లీన్ షేవ్‌తో హ్యాండ్‌సమ్ లుక్‌లో ఉన్నాడు. సినిమా టైటిల్ లోగో తెలుగు ‘అర్జున్ రెడ్డి’ లోగోను పోలి ఉంది. ఈ సినిమా టీజర్‌ను ఈనెల 16న విడుదల చేయనున్నట్లు చిత్ర యూనిట్ ప్రకటించింది. 
కాగా, ఈ సినిమాను ఈ4 ఎంటర్‌టైన్‌మెంట్‌ సంస్థ నిర్మిస్తోంది. రాధన్ సంగీతం సమకూరుస్తున్నారు. రవి కె. చంద్రన్ సినిమాటోగ్రఫీ అందిస్తున్నారు. ఇంగ్లండ్‌లో పుట్టి పెరిగిన మోడల్, నటి బనిత సంధు ఈ సినిమాలో ధృవ్‌ సరసన నటిస్తోంది. ప్రియా ఆనంద్ మరో హీరోయిన్. 



మరింత సమాచారం తెలుసుకోండి: