నవనీత్ కౌర్.. ఈ పేరు గుర్తుందా? శీను వాసంతి లక్ష్మీ, మహారథి లాంటి చిత్రాల్లో హీరోయిన్‌గా నటించిన ఈమె.. పార్లమెంటరీయన్‌గా మారిపోయారు. మహారాష్ట్రలోని అమరావతి నుంచి ఇండిపెండెంట్‌గా పోటీ చేసిన ఆమె.. ఐదుసార్లు ఎంపీగా పని చేసిన సీనియర్ నాయకుడిని ఓడించి మరీ ఆమె గెలవడం విశేషం.
నవనీత్ కౌర్ శివసేన సీనియర్ నేత ఆనందరావు విఠోబాను ఓడించారు. 2014 ఎన్నికల్లో శరద్ పవార్ నాయకత్వంలోని ఎన్సీపీ నుంచి పోటీ చేసి ఓడిన ఆమె.. ఈ ఎన్నికల్లో ఇండిపెండెంట్‌గా విజయం సాధించారు. బాబా రాందేవ్‌ను ఫాలో అయ్యే నవనీత్ కౌర్‌కు యోగా క్యాంపులో రాజకీయ నాయకుడైన రవి రాణాతో పరిచయం ఏర్పడింది.
తర్వాత 2011లో బాబా రాందేవ్ సమక్షంలోనే వాళ్లిద్దరూ పెళ్లాడారు. అలా ఆమెకు రాజకీయాలతో అనుబంధం ఏర్పడింది. ఆమె భర్త రవి రాణా బద్నేరా నియోజకవర్గం నుంచి రెండు సార్లు ఇండిపెండెంట్‌గా విజయం సాధించడం గమనార్హం. ఈ సెగ్మెంట్ అమరావతి లోక్ సభ పరిధిలోకి రావడం కౌర్‌కు కలిసొచ్చింది.
మహారాష్ట్ర సీఎం దేవేంద్ర ఫడ్నవీస్‌కు రవి రాణా మంచి స్నేహితుడు. దీంతో బీజేపీ తరఫునే పోటీ చేసే వీలున్నప్పటికీ.. శివసేనతో పొత్తు కారణంగా అది వీలుపడదు. మోదీ మళ్లీ అధికారంలోకి రావడం ఖాయమనే అంచనాతో.. ఎన్సీపీ నుంచి పోటీ చేయడం మంచిది కాదనే భావనతో నవనీత్ కౌర్ ఇండిపెండెంట్‌గా పోటీ చేశారు. అంతకు ఏడాది ముందు నుంచే జనం మధ్యన ఉండి వారితో మమేకమయ్యారు. మొత్తాన్ని పొలిటీషియన్‌ను పెళ్లి చేసుకొని.. హీరోయిన్ కూడా పొలిటీషియన్ అయిపోయారు.
