సినీ పరిశ్రమలో తమకంటూ కొన్ని ప్రిన్సిపుల్స్ పెట్టుకుని.. వాటిని మీరకుండా సాగిపోయే వాళ్లు కొద్దిమందే కనిపిస్తారు. ముఖ్యంగా హీరోయిన్లకు ఇలాంటి అవకాశం చాలా తక్కువగా ఉంటుంది. గ్లామర్ క్యారెక్టర్లు చేయను, లిప్ లాక్స్ కుదరదు అని ఈ రోజుల్లో నియమాలు పెట్టుకుంటే కెరీర్ ముందుకు సాగడం చాలా కష్టమవుతుంది.
కానీ చాలా కొద్దిమంది మాత్రం ఇలా సర్వైవ్ అవుతుంటారు. అందులో సాయిపల్లవి ఒకరు. ఆమె ఇప్పటిదాకా ఏ సినిమాల ఎక్స్‌పోజింగ్ చేసింది లేదు. ప్రతి సినిమాలోనూ నటనకు ప్రాధాన్యమున్న పాత్రే చేసింది. ఏదో ఒక ప్రత్యేకత లేనిదో ఆమె సినిమా ఒప్పుకోదు. స్కిన్ షో చేయడానికి ఒప్పుకోని సాయిపల్లవి లిప్ లాక్ అంటే ‘నో.. నెవర్’ అనే అంటుంది.
ఈ విషయాన్ని కొన్ని ఇంటర్వ్యూల్లో కూడా ఆమె స్పష్టం చేసింది. ఈ ప్రిన్సిపుల్ కారణంగా ఆమె ఒక క్రేజీ ప్రాజెక్టులో ఛాన్స్ కోల్పోయినట్లు సమాచారం. ఆ చిత్రం మరేదో కాదు.. డియర్ కామ్రేడ్ అట.‘డియర్ కామ్రేడ్’ ఫస్ట్ టీజర్‌కే హైలైట్‌గా నిలిచింది విజయ్ దేవరకొండ-రష్మికల లిప్ లాక్. తాజాగా ట్రైలర్లోనూ ఇద్దరూ పెదవి ముద్దులు బాగానే లాగించారు.
మరి ఆ ప్లేస్‌లో సాయిపల్లవిని ఊహించుకుని చూడండి. ఏదోలా ఉంది కదా? సాయిపల్లవి ఫీలింగ్ కూడా అదే. ముందుగా ఈ చిత్రంలో లిల్లీ పాత్ర కోసం సాయిపల్లవినే సంప్రదించాడట దర్శకుడు భరత్ కమ్మ. కానీ లిప్ లాక్స్ కంపల్సరీ అనడంతో ఆమె ఈ పాత్ర చేయనందట. విజయ్ దేవరకొండ లాంటి వాళ్లు లిప్ లాక్‌ను నవ్వు లాగే ఒక ఎమోషన్ లాగా చూడాలంటాడు కానీ.. సాయిపల్లవి మాత్రం ఈ విషయంలో చాలా సీరియస్‌గానే ఉన్నట్లుంది. కథ ప్రకారం చూస్తే సినిమాలో లిప్ లాక్స్ తీయడానికి లేనట్లే కనిపిస్తోంది.
ఆల్రెడీ ‘గీత గోవిందం’లో తన కెమిస్ట్రీతో మెస్మరైజ్ చేసిన విజయ్-రష్మిక మరోసారి అదరగొట్టినట్లే కనిపిస్తున్నారు కానీ.. విజయ్ లాంటి పెర్ఫామర్‌కు సాయిపల్లవి తోడై ఉంటే ‘డియర్ కామ్రేడ్’కు మరింత ఆకర్షణ వచ్చేదేమో అనిపిస్తోంది. మొత్తానికి లిప్ లాక్స్ ఉన్నాయని ఇంత పెద్ద ప్రాజెక్టు వదులుకుందంటే.. సాయిపల్లవి రూటే వేరని ఒప్పుకోవాలి.
