ఈ మద్య కొంత మంది హీరోయిన్లు నటిస్తున్న సినిమాలు థియేటర్లో రాకముందే నానా రచ్చ చేస్తున్న విషయం తెలిసిందే. పోస్టర్లతోనే సినిమాపై భారీ అంచనాలు పెంచుతున్నారు. అమలా పాల్ నటించిన 'ఆమె' మూవీపై ఎన్ని వివాదాలు వచ్చాయో తెలిసిందే. తెలుగు రాష్ట్రాల్లో ఉదయం ఆట వేయకపోయినా మధ్యాహ్నం నుంచి షోలు వేశారు థియేటర్ నిర్వాహకులు. మరికొన్ని చోట్ల ఈ మూవీ ప్రదర్శన నిలిపివేసినట్లు వార్తలు వచ్చాయి. అయితే ఈ సినిమాపై కొన్ని మహిళా సంఘాలు తీవ్ర ఆగ్రహాన్ని వ్యక్తం చేస్తున్నాయి.
ఈ మూవీలో అమలాపాల్ నగ్నంగ కనిపించడం..దానికి సంబంధించిన పోస్టర్లు వెలవడంపై మహిళాసంఘాలు తీవ్ర అభ్యంతరం తెలిపారు. 'ఆమె' అంటే అశ్లీలత కాదు, ఆమె అంటే ఆత్మ గౌరవం! అంటూ.. 'ఆమె' సినిమా పోస్టర్లను తగలబెట్టారు. ఈ సినిమాలో నటించినందుకు హీరోయిన్ అమలాపాల్‌కు.. తెరకెక్కించిన దర్శక నిర్మాతలకు చీవాట్లు పెడుతున్నారు. ఈ వివాదం మరువక ముందే అమలాపాల్ మరో సంచలన పోస్టర్ రిలీజ్ చేశారు. ఈ పోస్టర్ లో అమలా ఇంటెన్స్ లుక్ లో ఒక ఇనుప రాడ్ ను చేతిలో పట్టుకుని నిలబడి ఉంది.
ఇక దుస్తులకు బదులుగా క్రైమ్ సీన్ లో 'కాషన్: డు నాట్ క్రాస్ ది లైన్' అని రాసి ఉండే పసుపు రంగు స్ట్రిప్ ను దుస్తుల లాగా చుట్టుకుంది. ఈ మూవీ థ్రిల్లర్ జోనర్ తో తెరకెక్కుతున్నట్లు చిత్ర యూనిట్ తెలిపారు. ఈ సినిమాలో రమ్య సుబ్రమణియన్, శ్రీ రంజని, వివేక్ ప్రసన్న ఇతర కీలక పాత్రల్లో నటించారు. ఈ చిత్రానికి సంగీతం అందించిన వారు ప్రదీప్ కుమార్.
