బుల్లితెర బిగ్గెస్ట్ రియాలిటీ షో ‘బిగ్ బాస్’ సీజన్ 3 విజయవంతంగా 43 ఎపిసోడ్‌లను ముగించుకుని 44వ ఎపిసోడ్‌లోకి అడుగుపెట్టింది. సోమవారం నాటి ఎపిసోడ్‌లో ఒక సర్‌ప్రైజ్ గెస్ట్ హౌజ్‌మేట్స్‌ను పలకరించారు.
బిగ్ బాస్ సీజన్ 3 హోస్ట్ కింగ్ నాగార్జున తన పుట్టినరోజు వేడుకను జరుపుకోవడానికి కుటుంబ సభ్యులతో పాటు స్పెయిన్ వెళ్లిన సంగతి తెలిసిందే. అందుకే గడిచిన శని, ఆదివారాల్లో షోను రమ్యకృష్ణ నడిపించారు. నాగార్జున లేకపోవడంతో ఈవారం ఎలిమినేషన్‌ను కూడా క్యాన్సిల్ చేశారు. దీంతో మహేష్, హిమజ, పునర్నవి సేవ్ అయిపోయారు. రమ్యకృష్ణ చాలా హుందాగా షోను నడిపించిన తీరుపై ప్రశంసల వర్షం కురిసింది.
ఇక సోమవారం నాటి 44వ ఎపిసోడ్ సందడిగా మొదలైంది. ‘రాజాది రాజా.. గణనాథ.. విఘ్నేశ్వరాయ..’ పాటతో ఇంటి సభ్యులు నిద్రలేచారు. బిగ్ బాస్ ఇంటిలో వినాయక చవితి సందడి మొదలైంది. ఇంటి సభ్యుల పూజ కోసం బంతిపూలు, తోరణాలు, అరటి ఆకులు, పండ్లు, స్వీట్లు బిగ్ బాస్ అందజేశారు. వీటితో పాటు ఒక లేఖను కూడా ఉంచారు.
‘‘వినాయక చవితి శుభ సందర్భాన్ని పురష్కరించుకుని ఇంటి సభ్యులందరూ ఇంటిని అందంగా అలంకరించి ఈ పర్వదినాన్ని సంతోషంగా జరుపుకోవాలని బిగ్ బాస్ కోరుకుంటున్నారు. ఇంటి సభ్యులందరూ ఒకరి తరవాత ఒకరు గార్డెన్ ఏరియాలో ఉన్న ఒప్పో జోన్‌లోని కెమెరా ముందుకొచ్చి ఒక అగరబత్తిని వెలిగించి మీ కోరికను వినాయకుడికి తెలియజేయాల్సి ఉంటుంది’’ అని లేఖలో రాసున్న మెసేజ్‌ను శ్రీముఖి ఇంటి సభ్యులకు చదివి వినిపించింది.
ఇంటిని అందంగా అలంకరించిన అనంతరం ఒక్కొక్కరూ బిగ్ బాస్ చెప్పినట్టుగా కెమెరా ముందుకు వెళ్లి వినాయకుడికి తమ కోరికలను చెప్పుకున్నారు. వీరిలో హిమజ చాలా గట్టి కోరికే కోరింది. నవంబర్ 2న ఆమె పుట్టినరోజు. అంటే, బిగ్ బాస్ షో ఫైనల్ వీక్. కాబట్టి, ఈ ఏడాది తన పుట్టినరోజును బిగ్ బాస్ హౌస్‌లో సెలబ్రేట్ చేసుకోవాలని హిమజ కోరుకుంది. దీనికి ప్రేక్షకుల దీవెనలు తనకు కావాలని వేడుకుంది. ఇక, బాబా భాస్కర్ ఎవరికీ వినిపించకుండా తమిళంలో గణనాథుడిని ఏదో కోరేశారు.
అలీ రెజా, రవికృష్ణను బిగ్ బాస్ కన్ఫెషన్ రూంలోకి పిలిచారు. అయితే, ఎప్పటిలా కన్ఫెషన్ రూంలో వారితో బిగ్ బాస్ మాట్లాడలేదు. ఎదురుగా చిన్న మానిటర్‌లో చీకటిని చీల్చుకొస్తున్న చిన్న వెలుతురులో కనిపించీ కనిపించకుండా కూర్చున్న ఒక లేడీ వారికి దర్శనమిచ్చింది. ఆమెను రవి, అలీ గుర్తుపట్టలేకపోయారు. వారితో తనను తాను మిస్టరీ ఫ్రెండ్‌గా ఆమె పరిచయం చేసుకుంది. కాసేపు ముచ్చటించిన తరవాత.. ఎప్పటిలానే నామినేషన్ ప్రక్రియ మొదలుపెట్టారు.
