ఒకప్పుడు టాలీవుడ్ లో ఎన్నో హిట్ సాంగ్స్ కి సంగీతం అందించిన సంగీత దర్శకులు రాజ్ - కోటి. కొంత కాలంగా వీరిద్దరు విడిపోయి ఎవరి సపరేట్ గా సంగీతాన్ని అందించారు. అయితే కోటి సంగీతమే కాదు..మంచి సింగర్ అని పేరుంది. ప్రస్తుతం ఆయన టెలివిజన్ రంగంలో వచ్చే రియాల్టీ షోస్ లో జడ్జీగా వ్యవహరిస్తున్నారు. ఆయన టెలివిజన్ నేపథ్యంలో ఎంతో మంది సంగీత కళాకారులను తయారు చేశారు.
ఇప్పటి వరకు ఒక లెక్క ఇక నుంచి మరో లెక్క అన్నట్లు కోటి మ్యూజిక్ డైరెక్టర్, సింగర్ గానే కాదు.. ఇప్పుడు నటుడిగా తన విశ్వరూపాన్ని చూపించ బోతున్నారు. ఇప్పటి వరకు తెర వెనుక ఎన్నో అద్భుతాలు చేసిన కోటి ఇప్పుడు తెర ముందు అద్భుతాలు చేయబోతున్నట్లు తెలుస్తుంది. ‘దేవినేని’ మూవీ లో ఆయన పోలీస్ ఆఫీసర్ గా కనిపిస్తున్నాడు.
ఈ సందర్భంగా దర్శకుడు నర్రా శివ నాగేశ్వరరావు మాట్లాడుతూ..ఈ మూవీలో అందరూ బాగా నటించారు. ముఖ్యంగా చలసాని వెంకటరత్నం పాత్రలో తుమ్మల ప్రసన్న కుమార్, దేవినేని నెహ్రూగా నందమూరి తారక రత్న ఆ పాత్రల్లో పరకాయ ప్రవేశం చేశారు. సురేష్ కొండేటి వంగవీటి రంగగా అలరించనున్నారు. 1983 లో విజయవాడ ఫస్ట్ సూపరింటెండెంట్‌ ఆఫ్ పోలీస్ కేఎస్‌ వ్యాస్ పాత్రను ప్రముఖ సంగీత దర్శకుడు కోటి పోషిస్తున్నారు. ఇప్పటికే 75 శాతం షూటింగ్ పూర్తి అయింది. మరో షెడ్యూల్‌ తో టాకీ పార్ట్ పూర్తవుతుంది.
ఇక మ్యూజిక్ డైరెక్టర్ కోటి మాట్లాడుతూ..ఇప్పటి వరకు నా సంగీతాన్ని ఆదరించిన ప్రేక్షకులు ఇప్పుడు నటుడిగా నన్ను ఆదరిస్తారని భావిస్తున్నానని అన్నారు. శివనాగు వచ్చి మీరు ఈ క్యారెక్టర్ చేయాలి అనగానే నా చిన్నప్పుడు మా నాన్న నన్ను పెద్ద ఐపీఎస్‌ ఆఫీసర్‌గా చూడాలనుకున్న విషయం గుర్తుకు వచ్చి వెంటనే ఒప్పుకొన్నాను. ఆర్.టి.ఆర్ ఫిలింస్ పతాకంపై రాము రాథోడ్ ఈ సినిమాను నిర్మిస్తున్నారు.
