తమిళంలోనే కాకుండా తెలుగు చిత్ర పరిశ్రమలోనూ తనకంటూ మార్కెట్‌ను ఏర్పాటుచేసుకున్న నటుడు విశాల్. ఆయన నటించే సినిమాలకు తెలుగులో విపరీతమైన క్రేజ్ ఉంది. తాజాగా విశాల్ నటించిన సినిమా ‘యాక్షన్’. సుందర్ సి దర్శకత్వం వహించారు. మిల్కీ బ్యూటీ తమన్నా కథానాయికగా నటించారు. ఈ సినిమా టీజర్ తాజాగా విడుదలైంది. టైటిల్‌కు తగ్గట్టే సినిమాలో యాక్షన్ సన్నివేశాలు దుమ్మురేపుతున్నాయి. కొన్ని యాక్షన్ సీక్వెన్సెస్ చూస్తే వెంట్రుకలు నిక్కబరుచుకొనే విధంగా తీర్చిదిద్దారు. ఈ టీజర్లో యాక్షన్ సన్నివేశాలనే కాకుండా బ్యాక్ గ్రౌండ్ మ్యూజిక్ కు కూడా మంచి రెస్పాన్స్ వస్తుంది.
ఈ చిత్రంలో మొదటి సారిగా తమన్నా, విశాల్ కాంబినేషన్‌లో వస్తోన్న తొలి చిత్రమిది. సినిమాలో విశాల్ లుక్ కూడా చాలా స్టైలిష్‌గా ఉంది. వీరితో పాటు ఐశ్వర్య లక్ష్మి, యోగిబాబు, ఆకాంక్ష పూరి, కబీర్ దుహన్ సింగ్, రాంకీ తదితరులు కీలక పాత్రలు పోషిస్తున్నారు. హిప్ హాప్ తమిళ సినిమాకు సంగీతం అందించారు. ట్రైడెంట్ ఆర్ట్స్ బ్యానర్‌పై రవీంద్రన్ నిర్మాతగా వ్యవహరిస్తున్నారు. సినిమా మొత్తం యాక్షన్ నేపథ్యంలో సాగుతుందని టీజర్‌ను బట్టి అర్థమవుతోంది.
ఇప్పటివరకు విశాల్ కెరీర్‌లో ఇంతటి యాక్షన్ సన్నివేశాలతో కూడిన సినిమా చేసి ఉండరు. తమన్నాకు కూడా కేవలం గ్లామర్ పరంగా కాకుండా కీలక పాత్రే ఇచ్చినట్లు తెలుస్తోంది. ప్రస్తుతం ఈ టీజర్ యూట్యూబ్‌ ట్రెండింగ్స్‌లో టాప్ స్థానంలో ఉంది. విశాల్ చాల రోజుల తరువాత వస్తున్న ఈ సినిమా పై పెద్ద ఎత్తున అంచనాలు ఉన్నాయి.
త్వరలోనే "యాక్షన్" సినిమాను ప్రేక్షకుల ముందుకు తీసుకురానున్నారు. ఈ సినిమా తరువాత విశాల్ చేతిలో మరే ప్రాజెక్ట్స్ లేవు. దేనికి కారణం ఈ సినిమా విడుదలయ్యాక ఆయన పెళ్లిపీటలెక్కే అవకాశం ఉన్నట్లు తెలుస్తోంది. అయితే నటి అనీశాతో విశాల్‌కు నిశ్చితార్థం అయిన సంగతి తెలిసిందే. ఆ తర్వాత వీరిద్దరి పెళ్లి రద్దయిందని, నిశ్చితార్థం సమయంలో పెట్టిన ఫొటోలను అనీశా తొలగించారని వార్తలు వచ్చాయి.
కొన్ని రోజుల తర్వాత ఈ గాసిప్స్‌కు ఫుల్ స్టాప్ పెడుతూ అనీశా తనకు కాబోయే భర్తకు పుట్టినరోజు శుభాకాంక్షలు చెప్పారు. అతను తెలుగింటి అబ్బాయే అయినప్పటికీ తమిళంలో పాపులర్ అయ్యారు. 'పందెం కోడి', ‘సెల్యూట్’, ‘భరణి’, ‘అభిమన్యుడు’ వంటి సినిమాలతో విశాల్ తెలుగు ప్రేక్షకుల్లో మంచి పేరు తెచ్చుకున్నారు. మరోపక్క ఆయన నడిగర్ సంఘం బాధ్యతలను కూడా చూసుకుంటున్నారు. సంఘం సెక్రటరీగా బాధ్యతలు నిర్వర్తిస్తున్నారు.
