(నేడు) మంగళ వారం ఉదయం ప్రారంభమైన కర్ణాటక శాసనసభ ఎన్నిక ఓట్ల లెక్కింపు కార్యక్రమం కొనసాగుతోంది. తాజా సమాచారం ఆధారంగా కాంగ్రెస్, బీజేపీల మద్య పోరు రసవత్తరం, హోరాహోరీగా కొనసాగుతుంది. ప్రస్తుతం 64స్థానాల్లో కాంగ్రెస్, 106స్థానాల్లో బీజేపీ, 45స్థానాల్లో జేడీఎస్, ఇతరులు 2స్థానంలో ఆధిక్యంతతో కొనసాగుతున్నాయి. తన ప్రాధాన్య పాత మైసూరు ప్రాంతంలో జేడీఎస్ తన శక్తివంతమైన ఉనికిని చాటుకుంటోంది. ముఖ్యమంత్రి సిద్ధరామయ్యకు ప్రజా వ్యతిరేకత ధారుణంగా తగిలే సూచనలు కనిపిస్తున్నాయి.
యాంటి ఇంకంబెన్సీ చాప కింద నీరులాగే ప్రభుత్వంపై వ్యతిరేకతని చూపిస్తుంది. ఈ ప్రభావం చాముండేశ్వరిలో ప్రజలు తమ ఓటు ద్వారా నిరూపిస్తూనే ఉన్నారు. ఈ పాత మైసూర్ నియోజకవర్గంలో మూడు రౌండ్ల కౌంటింగ్ పూర్తయింది. తన సమీప ప్రత్యర్థి, జేడీఎస్‌కు చెందిన జీడీ దేవెగౌడ కంటే సిద్ధరామయ్య 11 వేల పైచిలుక ఓట్లతో వెనుకంజలో ఉన్నారు.
ఇక బాదామిలో సిద్ఱరామయ్యకు అభ్యర్థి శ్రీరాములు నుంచి గట్టి పోటీ ఎదురవుతోంది. బెంగళూరు నగరంలో ఆధిక్యత చూపగా, హైదరాబాద్ కర్ణాటక, ముంబై కర్ణాటక ప్రాంతాల్లో బీజేపీ ముందుంజలో ఉంది. దీంతో అక్కడ బిజెపి పై తెలుగుదేశం చేసిన విషప్రచారం అనేది ఏమాత్రం ప్రభావం చూపలేదనే చెప్పాలి. అలాగే లింగాయత్ ప్రాభావిత ప్రాంతాల్లో కూడా బిజెపి ఆధిఖ్యత కనిపిస్తుంది. దీన్ని బట్టి సిద్ధరామయ్య కుటిల వ్యూహాన్ని లింగాయత్తులు గుర్తించారనే చెప్పాలి.
ప్రస్తుతం వెలువడుతున్న ఫలితాల పద్దతిని పరిశీలిస్తుంటే, అత్యధిక "ఎగ్జిట్ పోల్స్ అంచనాలు" నిజమయ్యేలాగే కనిపిస్తున్నాయి. కాంగ్రెస్ నాయకులు ఎవరూ పార్టీ కార్యాలయం వద్ద కనిపించడం లేదు. ఫలితాల సరళి పూర్తిగా చూసిన తరువాతే పార్టీ కార్యాలయానికి వెళ్లాలని కాంగ్రెస్ నేతలు భావిస్తున్నట్టు తెలుస్తోంది. ఎన్నికల ఫలితాలను తెలుసుకుని, రాజకీయం నడిపేందుకు బెంగళూరుకు వచ్చిన గులాంనబీ ఆజాద్, అశోక్ గెహ్లట్ ప్రస్తుతానికి హోటల్‌ కే పరిమితం అయ్యారు. ప్రభుత్వ ఏర్పాటుకు జేడీఎస్ కీలకం కానుందని ఫలితాల సరళిని బట్టి తేలికగానే అర్ధమౌతుంది. దీంతో ఆ పార్టీ ముఖ్యనేతలతో గులాంనబీ ఆజాద్ మంతనాలు కొనసాగిస్తున్నట్టు సమాచారం . మరోవైపు బీజేపీ కార్యాలయం వద్ద కూడా ఇదే పరిస్థితి నెలకొంది.
