ప్రపంచంలో అత్యంత దట్టమైనవిగా పేరొందిన అమెజాన్ అడవులు తగలబడిపోతున్నాయనే వార్త యావత్ ప్రపంచాన్నే ఆందోళనకు గురిచేస్తోంది. అడవి తగులబడిపోతున్న చిత్రాలు చూసి.. వారూ, వీరు అనే తేడా లేకుండా ప్రతి ఒక్కరి హృదయం ద్రవించిపోతోంది. వేల సంఖ్యలో చెట్లు, ఎన్నో వణ్యప్రాణులు ఈ మంటలకు ఆహుతి అయిపోతున్నాయి. ప్రముఖ హాలీవుడ్ నటుడు టైటానిక్ సినిమా హీరో లియోనార్డో డికాప్రియో అడవులు తగులబడిపోతున్న ఫోటోలను తన ఇన్ స్టాగ్రామ్ అకౌంట్ లో పోస్ట్ చేస్తూ అడవులను కాపాడాలని కోరుతున్నాడు.
ఇందులో భాగంగా డికాప్రియో ఓ ముందడుగు వేశాడు. డికాప్రియో ఇటివల పర్యావరణాన్ని కాపాడేందుకు ఏర్పాటు చేసిన ఎర్త్ అలయన్స్ అనే ఫౌండేషన్ ద్వారా తన వంతు సాయం అందించటానికి ముందుకొచ్చాడు. ఏకంగా 5 మిలియన్ డాలర్ల (36 కోట్లు) ను అమెజాన్ అడవుల పరిరక్షణ కోసం విరాళంగా ప్రకటించాడు. ఈ మొత్తాన్ని అమెజాన్ అడవుల్లో పర్యావరణాన్ని కాపాడేందుకు వినియోగిస్తానని కూడా ప్రకటించి తన పెద్ద మనసును చాటుకున్నాడు. వన్య ప్రాణుల సంరక్షణకు తన సంస్థ ముందుంటుందని కూడా ఈ టీమ్ లో సభ్యులుగా ఉన్న సైంటిస్టులు, పర్యావరణవేత్తలు ప్రకటించారు. ప్రస్తుతం జరుగుతున్న జీ-7 సదస్సులో సభ్య దేశాలు కూడా అమెజాన్ అడవులను కాపాడేందుకు అవసరమైన ఆర్ధిక సాయం అందించేందుకు అంగీకరించాయి.
బ్రెజిల్ తోపాటు పెరూ, కొలంబియా, వెనిజులా, ఈక్వెడార్, బొలివియా, గయానా, ఫ్రాన్స్ దేశాల్లో లక్షలాది కిలోమీటర్ల వరకూ విస్తరించిన ఈ అడవులు ప్రపంచ మానవాళికి అవసరమైన 20 శాతం ఆక్సిజన్ ను అందిస్తున్నాయి. ఎన్నో జీవజాతులు, ఎన్నో తెగలు ఈ అడవుల రక్షణలో నీడ పొందుతున్నాయి. ఇలాంటి అడవులను కావాలనే ఎవరో దురుద్దేశంతో తగులబెట్టారనే వార్తలు వస్తున్నాయి. ఈ అడవులకు సహజసిద్ధంగా మంటలు అంటుకునే స్వభావం లేదనేది పర్యావరణవేత్తలు చెబుతున్న మాట.
