ఐసిస్ చీఫ్ అబూబకర్ బాగ్దాదీ కథ ముగిసింది. 90 నిమిషాల ఆపరేషన్ లో అమెరికా సైన్యం ధాటికి తట్టుకోలేక... కుటుంబంతో సహా ఆత్మహత్య చేసుకున్నాడు. ఆపరేషన్ బాగ్దాదీకి టర్కీతో పాటు ఓ ఉగ్రవాది భార్య ఇచ్చిన సమాచారం కీలకంగా మారింది.
ఐసిస్ కు చెందిన ఓ ఉగ్రవాదిని టార్గెట్ చేయడానికి వచ్చినట్టుగా ఆపరేషన్ మొదలుపెట్టిన అమెరికా... గుట్టుచప్పుడు కాకుండా పని పూర్తిచేసింది. తాము వేసిన ప్రణాళిక అనుకున్న విధంగా అమలు చేశామని వైట్ హౌస్ కు సమాచారమిచ్చింది అమెరికా సైన్యం. అల్ ఖైదా కమాండర్ గా జీవితం మొదలుపెట్టిన బాగ్దాదీ.. ఐసిస్ ను స్థాపించి అమెరికా కంటికి కునుకు లేకుండా చేశాడు. మరే ఉగ్రవాద సంస్థా విస్తరించినంత వేగంగా ఐసిస్ విస్తరించింది. సిరియా, ఇరాక్ లో మెజారిటీ భూభాగాన్ని ఒడిసిపట్టి... చాలా దారుణాలు చేసింది. ఎట్టకేలకు బాగ్దాదీ ఆత్మాహుతితో... ఐసిస్ మరింత బలహీనపడుతుందని భావిస్తోంది అమెరికా.
