సమ్మెపై ప్రభుత్వం విధించే డెడ్ లైన్లకు కార్మిక లోకం భయపడబోదని ఆర్టీసీ జేఏసీ ప్రకటించింది. సమ్మెకు సరైన పరిష్కారం చూపించాల్సిన బాధ్యత సర్కారుదేనని జేఏసీ నేతలు స్పష్టం చేశారు. కేసీఆర్ ప్రకటన నేపథ్యంలో హైదరాబాద్ లో సమావేశమైన యూనియన్ నాయకులు భవిష్యత్ కార్యాచరణపై చర్చించారు.
ఆర్టీసీ సమ్మెపై తెలంగాణ సీఎం కేసీఆర్ విధించిన ఐదో తేదీ డెడ్ లైన్ పై కార్మిక సంఘాల నేతలు చర్చలు జరిపారు. ముఖ్యమంత్రి చేసిన వ్యాఖ్యలు అర్థరహితమనీ, కార్మికులు ఎట్టి పరిస్థితుల్లోనూ విధుల్లో చేరబోరని అశ్వత్థామ రెడ్డి తెలిపారు. కేసీఆర్ విధించిన డెడ్ లైన్లలో ఇప్పటి వరకూ ఇది నాలుగోదని చెప్పారు. ఐదు వేల పైచిలుకు బస్సులను ప్రైవేట్ పరం చేస్తాననటం సరికాదని వ్యాఖ్యానించారు. విద్యార్థులకు పరీక్షలు ఉన్నందునే 5న రహదారుల దిగ్బంధం వాయిదా వేసుకున్నామని ప్రకటించారు అశ్వత్థామ రెడ్డి. అయితే ఆర్టీసీ సమ్మెపై సీఎం కేసీఆర్ చేసిన వ్యాఖ్యలు చూస్తుంటే కొత్త సమస్యలు సృష్టించేలా ఉన్నాయన్నారు అశ్వత్థామ రెడ్డి. ఆవేదనతో కార్మికులు పిట్టల్లా రాలిపోతున్నారని... సమ్మెపై చర్చలు జరపాలని ఆయన డిమాండ్ చేశారు.
ముఖ్యమంత్రి కేసీఆర్ సూచన మేరకు ఆర్టీసీ కార్మికులు విధుల్లో చేరాలని మంత్రి గంగుల కమలాకర్ అన్నారు. సమ్మెలో రాజకీయ నాయకులు చేరి కార్మికులను రోడ్డు పైకి తీసుకొచ్చారని విమర్శించారు. మునిసిపల్ ఎన్నికల్లో లబ్ది పొందేందుకు ఆయా రాజకీయ పార్టీలు బాబు మృతిని వాడుకున్నాయని ఆరోపించారు. ఆర్టీసీ సమ్మె విషయంలో ముఖ్యమంత్రి వైఖరి సరికాదని కేంద్ర హోంశాఖ సహాయ మంత్రి కిషన్ రెడ్డి విమర్శించారు. కార్మికులపై కక్షసాధింపు సరికాదన్నారు.
