వైజాగ్ భహిరంగ సభలో పవన్ కళ్యాణ్ .. వైసీపీ నేతల మీద వ్యక్తిగత విమర్శలు చేస్తూ అనుచిత వ్యాఖ్యలు చేసిన సంగతీ తెలిసిందే. దీనితో వైసీపీ నేతలు కూడా అంతే ధీటుగా ఒక్కొక్కరు ప్రెస్ మీట్ పెట్టి పవన్ ను చెడుగుడు ఆడుకుంటున్నారు. అయితే పవన్ ను నిలువరించేందుకు రంగంలోకి దిగుతున్న వైసీపీ నేతలు... పవన్ ను మించి విమర్శలు గుప్పిస్తున్న వైనం నిజంగానే ఆసక్తి రేకెత్తిస్తోంది. పవన్ పై వైసీపీ విమర్శలు... క్రమంగా ఘాటెక్కుతున్నాయన్న వాదనలూ లేకపోలేదు. వైసీపీ నుంచి వరుసగా ఎంట్రీ ఇస్తున్న మంత్రులు ఎమ్మెల్యేలు ఇతర నేతలు... పవన్ ను ఎడాపెడా మాట్లాడేస్తున్నారు. ఈ మాటల్లో పవన్ ను వ్యక్తిగతంగా టార్గెట్ చేసిన విమర్శలు కూడా క్రమంగా పెరుగుతున్నాయనే చెప్పక తప్పదు.
ఇప్పుడు పవన్ — వైసీపీ నేతల మధ్య జరుగుతున్న మాటల యుద్ధం ఇంకెంత దూరం పోతుందేమోనని అప్పుడు ఏపీలో ఆసక్తికర చర్చ నడుస్తుంది. నిన్నటికి నిన్న సినిమాలను వదిలేసిన పవన్... యాక్టింగ్ ను మాత్రం వదల్లేదని వైసీపీ మంత్రి కన్నబాబు సంచలన వ్యాఖ్యలు చేశారు. అసలు వైసీపీ ప్రభుత్వం తీసుకుంటున్న చర్యలపై మాట్లాడే అర్హత కూడా పవన్ కు లేదని కూడా కన్నబాబు రూలింగ్ ఇచ్చేశారు. ఒక్క సీటుకే ఇంతగా రెచ్చిపోతే... ఇంకొన్ని సీట్లు వచ్చి ఉంటే పవన్ ఏ రేంజిలో విరుచుకుపడేవారోనని కూడా కన్నబాబు ఆసక్తికర వ్యాఖ్యలు చేశారు.
ఇప్పుడు మరో వైసీపీ నేత ప్రకాశం జిల్లా ఎమ్మెల్యే సుధాకర్ బాబు .. పవన్ మీద మరింత రెచ్చిపోయారు. పవన్ చేసుకున్న పెళ్లిళ్లను పరోక్షంగా ప్రస్తావించిన సుధాకర్ బాబు... పవన్ ఓ చేతిలో తాళిని పట్టుకుని మరో చేతిలో ఎగతాళిని పట్టుకున్నారని సంచలన వ్యాఖ్యలు చేశారు. పవన్ ఎవరి మెడలో ఎప్పుడు తాళి కడతారో ఎవర్ని ఎప్పుడు ఎగతాళి చేస్తారో ఆయనకే తెలియదంటూ సుధాకర్ బాబు ఆసక్తికర వ్యాఖ్యలు చేశారు. ఎన్నికల్లో ఓడిపోయిన పవన్ సిగ్గులేకుండా రాజకీయాలు చేస్తున్నారని కూడా ఆయన మరో ఆసక్తికర వ్యాఖ్య చేశారు. పవన్.. కార్పొరేటర్కు ఎక్కువ ఎమ్మెల్యేకు తక్కువ అని సుధాకర్ బాబు మరో పవర్ పంచ్ సంధించారు.
