ప్రభుత్వ టీచర్లు వారి బదిలీల సమయంలో తాము బోధించిన పాఠశాలను వదిలి వెళ్తుంటే ఆ పాఠశాల విద్యార్థులు బోరుమని ఏడ్చిన సంఘటనలను మనం ప్రత్యక్షంగానో... పరోక్షంగానే చూసాం. ఇంతవరకు చూసిన వాటిలో వెళ్లొద్దు సార్ అంటూ విద్యార్థి విద్యార్థినులు కంటతడి పెట్టుకున్నారు. కానీ ఇప్పుడు మాత్రం... ఒక స్కూలు ప్రధానోపాధ్యాయురాలు బదిలీ అవ్వనప్పటికీ.. ఆ పాఠశాల విద్యార్థినులు ఆమెను స్కూల్ నుంచి బయటికి తోసేస్తున్నారు. ఎందుకో ఇప్పుడు తెలుసుకుందాం.
వివరాల్లోకి వెళితే.. చిత్తూరు జిల్లా బి.కొత్తకోట మండలం గట్టు జడ్పీ ఉన్నత పాఠశాల ప్రధానోపాధ్యాయురాలుగా శ్రీదేవి బాధ్యతలు నిర్వహిస్తున్నారు. అయితే ఆ ఉన్నత పాఠశాలలో విద్యనభ్యసించే ఒక విద్యార్థినిని అయిదుగురు ఆకతాయిలు గత కొంతకాలంగా వేధిస్తున్నారు. పాఠశాలకు వెళ్ళేటప్పుడు.. మళ్లి ఇంటికి తిరిగివచ్చేపుడు..ఇంకా పాఠశాలలో ఉన్నపుడు కూడా ఆ యువకులు ఆ బాలికను వేధిస్తున్నారు. దాంతో వారి వేధింపులను తాళలేక.. ఆ విద్యార్థిని పాఠశాల యొక్క హెడ్ మాస్టర్ అయిన శ్రీదేవికి ఆకతాయిల గురించి చెప్పింది. కానీ శ్రీదేవి పోలీసులకు ఆకతాయిల మీద ఫిర్యాదు చేయకుండా నిర్లక్ష్యంగా వ్యవహరించింది.
విద్యార్థిని ఫిర్యాదు చేసినా పోలీసులకి తెలియజేయలేదన్న ఆగ్రహంతో....ఈ హెచ్‌ఎం మాకు వద్దంటూ .... ఆ ఊరిలోని కొంత మంది మహిళ గ్రామస్తులు.. ఇంకా విద్యార్థినులు అందరూ కలిసి.. ప్రధానోపాధ్యాయురాలు శ్రీదేవిని బయటకు తోసుకుంటూ ఆందోళనకు దిగారు. ఇక పోతే.. ఆదివారం రోజు.. ఆ అయిదుగురు ఆకతాయి లోని ఒక ఆకతాయిని గ్రామస్తులు పట్టుకుని దేహశుద్ధి చేశారు. ఇక మిగిలిన ఆకతాయిలతో సహా ఈ దేహశుద్ధి చేయించుకున్న అతన్ని కూడా సోమవారం పోలీసులు అదుపులోకి తీసుకున్నారు. సమాజంలో చదువుకొని మగవాళ్ళు అంతా అమ్మాయిలను వేధించే పనిలోనే ఉన్నారంటూ అక్కడి గ్రామస్థులు మండిపడుతున్నారు. హెడ్ మాస్టర్ అయ్యుండి విద్యార్థుల మంచి చెడ్డలు చూసుకోకపోవడంతో ఆమెకు కూడా చివాట్లు పెడుతున్నారు.
