పుల్వామా ఆత్మాహుతి దాడి తర్వాత బాలాకోట్‌లోని ఉగ్రస్థావరంపై భారత వైమానిక దళం దాడులు చేసింది. ఈ దాడులకు ప్రతిగా పాకిస్థాన్ సరిహద్దుల్లోని భారత సైనిక స్థావరాలను లక్ష్యంగా చేసుకుని ఎఫ్-16 యుద్ధ విమానాలతో దాడులకు తెగబడింది. నిబంధనలకు విరుద్ధంగా ఎఫ్-16 యుద్ధ విమానాలను ఉపయోగించడంపై ఆగ్రహం వ్యక్తం చేసింది. ఈ మేరకు అమెరికా భద్రత కార్యదర్శి ఒకరు పాక్‌కు లేఖ రాసినట్లు అంతర్జాతీయ మీడియా తెలిపింది.ఈ దాడులను సమర్ధంగా తిప్పికొట్టిన భారత్..పాక్ ప్రయోగించిన ఎఫ్-16 యుద్ధ విమానాన్ని మిగ్‌ - 21 ద్వారా కూల్చివేసింది. 

 

ఎఫ్-16 శకలాలను గుర్తించిన భారత్.. వాటిని మీడియా ముందుంచింది. ఉగ్రవాదులపై దాడులకు ఉపయోగించాల్సిన ఎఫ్‌-16లను భారత్‌పై దాడులకు పాక్ ఉపయోగించి నిబంధలను ఉల్లంఘించింది. అంతర్జాతీయ నిబంధనల ఉల్లంఘనలపై అమెరికా స్పందిస్తూ పాకిస్థాన్‌పై ఆగ్రహం వ్యక్తం చేసింది. ఈ మేరకు అమెరికా ఆయుధ నియంత్రణ, అంతర్జాతీయ భద్రతా వ్యవహారాల అండర్‌ సెక్రటరీ ఆండ్రియా థాంప్సన్ పాక్‌ వైమానిక దళం అధిపతి ఎయిర్ చీఫ్ మార్షల్‌ ముజాహిద్‌ అన్వర్‌ ఖాన్‌పై ఆగ్రహం వ్యక్తం చేస్తూ ఆయన లేఖ రాసినట్లు పత్రిక పేర్కొంది. ఫిబ్రవరి 26న బాలాకోట్‌ వైమానిక దాడుల తర్వాత జరిగిన సంఘటనలను నేరుగా ప్రస్తావించని ఆయన.. ఎఫ్‌-16 విమానాలను ఇతర దేశాలపై ప్రయోగించి కొనుగోలు సమయంలో చేసుకున్న ఒప్పందాన్ని పాక్‌ ఉల్లంఘించిందని ఆయన లేఖలో ప్రస్తావించారు. 

 

ఎఫ్-16 యుద్ధ విమానాలు దేశ రక్షణ కోసం ఉపయోగించినట్టు తెలిపారు కానీ, వాటిని అమెరికా అధీకృతంలో లేని ప్రాంతాలకు తరలించడం కొనుగోలు ఒప్పందానికి విరుద్ధమని వ్యాఖ్యానించారు. ఇటువంటి చర్యల వల్ల అమెరికాకు చెందిన సున్నితమైన భద్రతా సాంకేతికత పరిజ్ఞానం పక్కదారి పట్టి, ఇతరుల చేతుల్లోకి వెళ్లే ప్రమాదం లేకపోలేదని ఆయన హెచ్చరించారు. పాకిస్థాన్ తమ వద్ద నుంచి కొనుగోలుచేసిన ఎఫ్-16 యుద్ధ విమానాలను దుర్వినియోగం చేసినట్టు భారత్ ఇచ్చిన నివేదికను పరిశీలిస్తున్నామని గత మార్చిలోనే అమెరికా వెల్లడించింది. 

 

యుఎస్ డిఫెన్స్ టెక్నాలజీలతో కూడిన ద్వైపాక్షిక ఒప్పందాలు లేదా వాటి సమాచారం గురించి బహిరంగంగా వ్యాఖ్యానించమని అమెరికా అధికార వర్గాలు తెలిపాయి. కాగా, అమెరికా నుంచి పాకిస్థాన్ మొత్తం 76 ఎఫ్-16 రకం విమానాలు కొనుగోలుచేసింది. వీటిలో అధిక శాతం యుద్ధ విమానాలే. అమెరికా రక్ష శాఖ నిబంధల ప్రకారం.. పాకిస్థాన్ ఈ యుద్ధ విమానాలను కేవలం ఉగ్రవాద వ్యతిరేక ఆపరేషన్ల కోసమే వినియోగించాలి.. విదేశాలపై దాడులకు వీటిని వాడరాదు. 

మరింత సమాచారం తెలుసుకోండి: