పవన్ సన్నిహితుడు, జనసేన పొలిట్ బ్యూరో సభ్యుడు రాజు రవితేజ్ జనసేన పార్టీకి రాజీనామా చేశారు. పవన్ ప్రవర్తన నచ్చకపోవడంతోనే పార్టీని వీడుతున్నానని తెలిపారు. ఈమేరకు రాజు రవితేజ ఓ ప్రకటన విడుదల చేశారు. ఇకపై పవన్‌తో కానీ, జనసేన పార్టీతో కానీ తనకు ఎలాంటి సంబంధం ఉండదన్నారు. పవన్ కోరిక మేరకు తనకు ఇష్టం లేకపోయినప్పటికీ పొలిట్ బ్యూరోలో చేరానన్నారు.
‘‘పార్టీ భావజాలం, రాజ్యాంగాన్ని సృష్టించి, పార్టీని ప్రారంభించడంలో కీలక పాత్ర పోషించాను. జనసేన మెదటి ప్రధాన కార్యదర్శిగా బాధ్యతలు చేపట్టాను. ప్రస్తుతం నేను పార్టీ పొలిట్ బ్యూరో సభ్యుడిని. పవన్ కోరిక మేరకు నాకు ఈ పదవి ఇష్టం లేకపోయినా అంగీకరించాను. ఇక మీదట నేను పవన్ కళ్యాణ్‌తో, జనసేనతో కలిసి పని చేయను. ఒకప్పుడు మంచి వ్యక్తి అయిన పవన్.. ప్రస్తుతం కక్ష సాధింపుతనం, కుల, మతపరమైన ద్వేషంతో నడిచే ప్రమాదకరమైన విభజన శక్తిగా మారిపోయారు. రాజకీయ లేదా సామాజిక శక్తి ఉన్న పదవిని ఆక్రమించటానికి అతణ్ని అనుమతించకూడదు. పవన్ ఎలాంటి రాజకీయ అధికారానికి అర్హుడు కాదు’ అని రాజు రవితేజ్ తన ప్రకటనలో పేర్కొన్నారు.
రాజు రవితేజ్ రాజీనామాను జనసేన పార్టీ ఆమోదించింది. ఆయన పార్టీ పట్ల వ్యక్తం చేసిన ఆవేదనను, అభిప్రాయాలను గౌరవిస్తున్నామని జనసేన తెలిపింది. గతంలో కూడా ఆయన ఇలాంటి బాధతోనే పార్టీని వీడి తిరిగి వచ్చారని పేర్కొంది. ఆయనకు మంచి భవిష్యత్తు, ఆయన కుటుంబానికి శుభం కలగాలని ఆ జగన్మాతను ప్రార్థిస్తున్నానని పవన్ కళ్యాణ్ పేరిట ప్రకటనను విడుదల చేశారు.
పవన్ కళ్యాణ్ గతంలో ఇజం పేరిట పుస్తకాన్ని వెలువరించిన సంగతి తెలిసిందే. ఈ పుసక్తాన్ని పవన్, రాజు రవితేజ్ కలిసి రాశారు. తెలంగాణలో వరంగల్ జిల్లా జమ్మికుంటకు చెందిన ఆయన పవన్‌కు అత్యంత సన్నిహితుల్లో ఒకరు. జనసేన పార్టీ ఏర్పాటులో ఆయన కీలక పాత్ర పోషించారు. ‘నా వెనుక డబ్బున్న వారు, రాజకీయ నాయకులు లేరు. రాజు రవితేజ ఒక్కరే ఉన్నారు’ అని జనసేన పార్టీ ప్రకటన చేస్తూ పవన్ కళ్యాణ్ చెప్పడాన్ని బట్టి.. ఆయన పవన్‌కు ఎంత సన్నిహితుడో అర్థం చేసుకోవచ్చు. చిరంజీవి ప్రజారాజ్యం పార్టీలో పవన్ కళ్యాణ్ యువరాజ్యం అధ్యక్షుడిగా వ్యవహరించగా.. రాజు రవితేజ్ ఉపాధ్యక్షుడిగా పని చేశారు. 16 ఏళ్ల వయసులో ఆయన వెయిటర్‌గా జీవితాన్ని ప్రారంభించారు.
