గడిచిన కాలంలో మంచి, చెడు ఏదైనా అవి మనకు మధుర స్మృతులే. అందులో కొన్ని మధుర జ్ఞాపకాలు అందరికీ ప్రత్యేకమైన అనుభూతినిస్తాయి. ఇప్పటికి ఓ పది లేదా ఇరవై ఏళ్లు వెనక్కి వెళ్లి ఆ స్మృతులను ఏదో ఓ సందర్భంలో ప్రతి ఒక్కరూ నెమరు వేసుకుంటుంటారు. ఇలాగే తాజాగా తెలంగాణ పురపాలక, ఐటీశాఖ మంత్రి కేటీఆర్ కూడా తాను యువకుడిగా ఉన్నప్పటి ఓ సందర్భాన్ని గుర్తు చేసుకున్నారు. అది తాను 22 ఏళ్ల వయసులో ఉన్న సందర్భం. అంటే 22 ఏళ్ల నాటి స్మృతి ఇది. ప్రస్తుతం కేటీఆర్‌కు 44 ఏళ్లు.
కేటీఆర్‌కు అంతర్జాతీయ డ్రైవింగ్ పర్మిట్ లైసెన్స్ ఉండడం విశేషం. దాని తాలూకు ఫోటోలను కేటీఆర్ ట్విటర్ ద్వారా పంచుకున్నారు. ఇంటర్నేషనల్ డ్రైవింగ్ లైసెన్స్‌లో ఉన్న ఫోటోలో కేటీఆర్ నూనూగు మీసాలతో అమాయకంగా ఉన్నారు. ఉమ్మడి ఆంధ్రప్రదేశ్ ప్రభుత్వంలోని రవాణా విభాగం జారీ చేసిన ఈ లైసెన్స్‌లో కేటీఆర్ వ్యక్తిగత వివరాలు ఉన్నాయి.
పేరు.. కల్వకుంట్ల తారకరామారావు.. సన్నాఫ్ కే.చంద్రశేఖర్ రావు, జన్మస్థలం సిద్దిపేట్, డేట్ ఆఫ్ బర్త్ 24.07.1976గా ఉంది. ఇంటి అడ్రస్ ఖైరతాబాద్ అని పేర్కొన్నారు. దీనిపై రవాణాశాఖ ముద్ర కూడా ఉంది. దీనికి సంబంధించిన ఫోటోలను కేటీఆర్ ట్విటర్‌లో వివరిస్తూ ఈ డ్రైవింగ్ లైసెన్స్ 1998 నాటిదని అంటే గత శతాబ్దిలోనిది అని పేర్కొన్నారు. ఈ లైసెన్స్ తన ఇంట్లో చాలా కాలం తర్వాత గుర్తించినట్లు వివరించారు.
కేటీఆర్ చేసిన ఈ ట్వీట్‌తో నెటిజన్లు వివిధ రకాలుగా కామెంట్లు పెడుతున్నారు. ‘మీరు మళ్లీ మీసాలు పెంచవచ్చు కదా’, ‘మీరు సినిమా హీరో అయ్యే అవకాశాన్ని మిస్ చేసుకున్నారేమో’, ‘ఈ సమయంలో మీ నాన్నగారే కదా ట్రాన్స్‌పోర్ట్ మినిస్టర్?’, ‘ఈ 22 ఏళ్ల యువకుణ్ని అస్సలు గుర్తు పట్టలేకున్నాం’ అని రకరకాలుగా కామెంట్లు పెడుతున్నారు.
