ఏపీ సీఎం జగన్ మరోసారి ప్రధాని మోడీకి జలక్ ఇవ్వబోతున్నారు. ఎన్నార్సీ, ఎన్పీఆర్, సీఏఏ అంశాలపై దేశవ్యాప్తంగా ఆందోళన పెల్లుబుకుతున్న వేళ.. ఏపీలోనూ ఈ అంశాలపై మైనారిటీలు ఆందోళనతో ఉన్నారు. ఎన్నార్సీ, ఎన్పీఆర్, సీఏఏలకు వ్యతిరేకంగా ఏపీలోనూ పెద్ద ఎత్తున ముస్లింలు సభలు, సమావేశాలు, ర్యాలీలు నిర్వహిస్తున్నారు.
గతంలో సీఏఏ సవరణ చట్టం రూపొందేవేళ వైసీపీ ఈ చట్టానికి మద్దతు ఇచ్చిందన్న ఆరోపణలు ఉన్నాయి. అందుకే ఈ అంశంలో వైసీపీ కాస్త ఇబ్బందిపడుతోంది. దీంతో ఆ పార్టీ టార్గెట్ గా నేతలు విమర్శలు ప్రారంభించారు. ఇటీవల ఏపీలో జరిగిన ఓ సభలో అసదుద్దీన్ ఒవైసీ మాట్లాడుతూ జగన్ కు మోడీ అంటే భయమని.. అదే వైఎస్సార్ ఉంటే రెండు నిమిషాల్లో ఈ చట్టాన్ని ఆపేసేవాడని కామెంట్ చేశారు.
ఈ నేపథ్యంలో జగన్ ఓ కీలక ప్రకటన చేశారు. ఎన్పీఆర్ చట్టంపై మైనారీటీలు ఆందోళన చెందాల్సిన అవసరం లేదని ముఖ్యమంత్రి వైయస్ జగన్ మోహన్ రెడ్డి పేర్కొన్నారు. ఈ మేరకు మంగళవారం సీఎం ఓ ప్రకటన విడుదల చేసారు. ఎన్పీఆర్లో ప్రతిపాదించడ్డ కొన్ని ప్రశ్నలు ఆంధ్రప్రదేశ్ రాష్ట్రంలోని మైనారిటీల్లో అభద్రతా భావాన్ని కలుగజేస్తున్నాయని ఆయన వ్యాఖ్యానించారు.
ఈ అంశంపై పార్టీలో విస్తృతంగా చర్చ జరిపామని... 2010లోని నిబంధనలనే ఇప్పుడు కూడా పాటించాలని కేంద్రాన్ని కోరతామని ఆయన అన్నారు. అంతే కాదు.. దీనికి సంబంధించి అసెంబ్లీ సమావేశాల్లో తీర్మానం చేస్తామని కూడా సీఎం వైయస్ జగన్ తన ప్రకటనలో తెలిపారు.