കൊറോണയെന്ന ഇരുട്ടിനെ അകറ്റാന് ഒമ്പത് മിനിറ്റ് ജനങ്ങളോട് അഭ്യര്ഥിച്ച് പ്രധാനമന്ത്രി നരേന്ദ്ര മോദി.
ഏപ്രില് അഞ്ച് രാത്രി ഒന്പത് മണി മുതല് ഒമ്പത് മിനിട്ട് നേരം വൈദ്യുത ലൈറ്റുകള് അണച്ച് കൈവശമുള്ള ചെറിയ ദീപങ്ങള് തെളിയിക്കണമെന്നും പ്രധാനമന്ത്രി നിര്ദേശിച്ചു. ഇങ്ങനെ കൊറോണ ഭീഷണിയുടെ ഇരുട്ട് നമ്മള് മായ്ക്കണമെന്നും പ്രധാനമന്ത്രി അഭിപ്രായപ്പെട്ടു.
ടോര്ച്ച് ലൈറ്റോ, മൊബൈല് ഫ്ളാഷോ, മെഴുകുതിരിയോ ചിരാതുകളോ തെളിയിക്കണം. വീട്ടില് എല്ലാവരും ചേര്ന്ന് ബാല്ക്കണിയിലോ വാതില്പ്പടിയിലോ നിന്ന് ഈ ചെറുദീപങ്ങള് തെളിയിക്കണമെന്നാണ് അദ്ദേഹം നിര്ദേശിച്ചത്. ഈ വെളിച്ചം 130 കോടി ജനങ്ങളുടെ ശക്തിയുടെ പ്രകടനമാകും.
കൊറോണയുടെ അന്ധകാരത്തില് നിന്ന് പ്രകാശത്തിലേക്ക് നയിക്കാന് നമുക്ക് ഒരുമിച്ച് ഈ സമയം നീക്കിവെക്കാമെന്നാണ് പ്രധാനമന്ത്രി ആഹ്വാനം ചെയ്തത്. റോഡുകളില് ആരും ഒത്തുകൂടരുതെന്നും കൊറോണ വൈറസിനെ തകര്ക്കാനുള്ള ഏക മാര്ഗം സാമൂഹിക അകലം പാലിക്കുക മാത്രമാണെന്നും പ്രധാനമന്ത്രി പറഞ്ഞു.
ലോക്ക്ഡൗണിനോട് രാജ്യം നന്നായി പ്രതികരിച്ചു. രാജ്യത്തിന്റെ സാമൂഹിക ശക്തി പ്രകടമാകുന്നു. രാജ്യം ഒന്നായി കൊറോണയോട് പൊരുതുകയാണെന്നും ആരും ഒറ്റയ്ക്കല്ലെന്നും പ്രധാനമന്ത്രി കൂട്ടിച്ചേര്ത്തു. 130 കോടി ജനങ്ങളുടെ കൂട്ടായ ശക്തി എല്ലാവര്ക്കുമൊപ്പം ഉണ്ടെന്ന് അദ്ദേഹം വ്യക്കമാക്കി