కరోనాకు మందు లేదు.. ఇంకా వ్యాక్సీన్ రాలేదు.. నిజమే కానీ.. కరోనా ప్రభావాన్ని తగ్గించేందుకు ఇప్పటికే మార్కెట్లోకి అనేక మందులు వచ్చేశాయి. అందులో టాబ్లెట్లు, ఇంజెక్షన్లు ఉన్నాయి. తాజాగా బయోకాన్ కంపెనీ కూడా ఓ ఇంజక్షన్ ను అందుబాటులోకి తెచ్చింది. దాని పేరు ఇతోలిజుమాబ్ 25ఎంజీ/ 5ఎంఎల్‌ .
కొవిడ్‌- 19 వల్ల ఊపిరి తీసుకోవటంలో తీవ్రంగా ఇబ్బందులు పడే వారికి తప్పనిసరి పరిస్థితుల్లో ఇతోలిజుమాబ్ ఇంజక్షన్ ఇచ్చేందుకు బయోకాన్‌కు ఇటీవల డ్రగ్‌ కంట్రోలర్‌ జనరల్‌ ఆఫ్‌ ఇండియా..డీసీజీఐ నుంచి పర్మిషన్ వచ్చింది. ఇటువంటి అనుమతి గల ఔషధం ఇదొక్కటేనని బయోకాన్ చెబుతోంది.
ఇంతకీ ఈ ఇంజక్షన్ ధర ఎంతో చెప్పలేదు కదూ.. ఒక్కో ఇంజక్షన్ ధర రూ.7,950. దీన్ని రోగికి నాలుగు సార్లు ఇవ్వాల్సి వస్తుంది. అంటే.. నాలుగు ఇంజక్షన్లకు రూ.32,000 ఖర్చు అవుతుందన్నమాట. వాస్తవానికి ఈ ఇతోలిజుమాబ్ ఇంజక్షన్ కొత్తదేమీ కాదు.. ఇప్పటి వరకూ దీన్ని సోరియాసిస్ వ్యాధి కోసం వాడుతున్నారు.
ఇప్పుడు దాన్నే కరోనా చికిత్సకూ వాడుతున్నారు. ఈ ఏడాది చివరికో లేక వచ్చే ఏడాది ప్రారంభంలోనే వ్యాక్సిన్‌ వచ్చే అవకాశం ఉంది. అయితే.. కొవిడ్‌-19 తిరగబెట్టదనే గ్యారెంటీ ఏదీ లేదు. అంతే కాదు.. ఈ వ్యాక్సిన్‌ ప్రభావం ఎలా ఉంటుంది, ఎంతకాలం ఉంటుంది... అనేది కూడా చెప్పలేం. అందుకే ఇలాంటి మందులను రెడీ చేసుకోవాల్సిన అవసరం ఎంతైనా ఉంది. కానీ కాస్త ధరలే సామాన్యులకూ అందుబాటులో ఉండే చూస్తే మంచిది.
