ఆసియాలో అత్యంత సంపన్నుడు, అపర కుబేరుడు, రిలయన్స్‌ ఇండస్ట్రీస్ అధినేత ముఖేష్ అంబానీ ఇంటికి పెళ్లి కల వచ్చిందన్న సంగతి తెలిసిందే. ఇప్పటికే ముఖేష్ దంపతుల కవల పిల్లలయిన పెద్ద కొడుకు ఆకాష్ అంబానీ, ఇషా అంబానీల నిశ్చితార్థం అయిందన్న విషయం విదితమే. ఇక చిన్న కొడుకయిన అనంత్‌ అంబానీ పెళ్లి కూడా జరిగే సూచనలు కనిపిస్తున్నాయి.
కాగా అంబానీ కుటుంబం యొక్క పెళ్ళి వార్త మరోమారు వార్తల్లోకెక్కింది. ఈ వార్తలకు ప్రధాన కారణం ఆకాష్ అంబానీ యొక్క ఎంగేజ్మెంట్ ఆహ్వాన వీడియో. ఆకాశ్ అంబానీ తన చిన్ననాటి స్నేహితురాలు శ్లోకా మెహతాను అతి త్వరలో వివాహం చేసుకోబోతున్నాడు. మరి దేశంలో అంబానీ కుటుంబ పెళ్ళి అంటే మామూలుగా ఉంటుందా! అంచనాలన్నీ ఓ రేంజిలో ఉంటాయి.
ఆ అంచనాలకు తగ్గట్టుగానే వివాహ కసరత్తులు ప్రారంభించాడు అంబానీ. దీనికి సంబంధించి ప్రస్తుతం ఆకాశ్ అంబానీ ఎంగేజ్మెంట్ ఆహ్వాన వీడియోను విడుదలచేసి తాను పెళ్ళి ఎలా చేయబోతున్నాడో ఒక ట్రైలర్ ను చూపించాడు. షెహనాయి సాంగ్ బ్యాక్‌గ్రౌండ్‌లో ఎంగేజ్మెంట్ వీడియో రూపొందించి, ఈ నెల 30వ తేది శనివారం, ముంబైలోని అట్లామౌంట్ రోడ్‌లో జరగనున్న తన పెద్ద కొడుకు ఆకాశ్ అంబానీ ఎంగేజ్మెంట్ వేడుకకు రావలసిందిగా అతిధులను ఆహ్వానించాడు. గతంలో జరిగిన ఎంగేజ్మెంట్ కు బాలీవుడ్ ప్రముఖులు హాజరవగా ప్రస్తుతం జరుగబోయే దానికి అన్ని రంగాల్లోని వారిని ఆహ్వానించడం జరిగింది.
