ఆ మద్య కొరటాల శివ దర్శకత్వంలో యంగ్ టైగర్ ఎన్టీఆర్, మాలీవుడ్ సూపర్ స్టార్ మోహన్ లాల్ నటించిన ‘జనతా గ్యారేజ్’ సినిమా గురించి అందరికీ తెలిసిందే. ఈ సినిమాలో అన్యాయం జరిగిన వారికి న్యాయం కోసం ఎంత దూరమైనా వెళ్లి బాధితులను రక్షించే బాధ్యత జనతా గ్యారేజ్ చేస్తుంది. ఈ జనతా గ్యారేజ్ మొదట మోహన్ లాల్ నడిపిస్తే..తర్వాత ఎన్టీఆర్ వారసత్వంగా కొనసాగిస్తుంటాడు. ఇది సినిమా..చూడటానికి ఎంతో గొప్పగా కనిపిస్తుంది. కానీ ఇప్పుడు జనతా గ్యారేజ్ అని చెప్పి ఓ ఆకతాయి రెచ్చిపోయాడు.
ఓ వాట్సాప్ గ్రూపును ఏర్పాటు చేయడంతోపాటు ఎవరికైనా సమస్యలు ఉంటే పరిష్కరిస్తానని చెప్పడం మొదలుపెట్టాడు. ఇంత వరకు బాగానే ఉన్నా సదరు వ్యక్తి కత్తి పట్టుకొని రోడ్డు పై హల్ చల్ చేయడంతో అక్కడున్న వారు బెంబేలెత్తిపోయారు. స్థానికులు ఇచ్చిన సమాచారంతో ఘటనాస్థలానికి చేరుకున్న పోలీసులు నిందితుడిని స్టేషన్ కు తరలించారు. ఈ ఘటన గుంటూరు జిల్లాలో చోటుచేసుకుంది. తాడేపల్లి మండలం ఉండవల్లిలో ప్రదీప్ అనే యువకుడు ‘జనతా గ్యారేజ్’సినిమా స్ఫూర్తిగా తీసుకొని తాను సమాజాన్ని ఉద్దరిస్తానని..అన్యాయం జరిగిన వారికి న్యాయం చేస్తానని రోడ్డుపై చేతిలో కత్తితో హల్ చల్ చేశాడు.
తాను ఓ వాట్సాప్ గ్రూప్ క్రియేట్ చేసి ఎవరికైనా ఇబ్బందులు ఉంటే వాటిని సెటిల్ చేస్తానని వారికి హామీ ఇవ్వడం జరిగింది. ఈ నేపథ్యంలో ఓ వివాదంపై రోడ్డు పై కత్తి పట్టుకొని హల్ చల్ చేశాడు. ఇతను గతంలో పలు నేరాలకు పాల్పడినా పోలీసులు చర్యలు తీసుకోలేదన్న ఆరోపణలు ఉన్నాయి. ప్రదీప్ ఉండవల్లిలో కత్తిని చేతిలో పట్టుకుని గట్టిగా ఫోన్ లో మాట్లాడుతూ కనిపించాడు. దాంతో అక్కడ ఉన్న స్థానికులు భయ కంపితులై పోలీసులకు సమాచారం అందించారు. ఘటనాస్థలానికి హుటాహుటిన చేరుకున్న అధికారులు.. నిందితుడిని అదుపులోకి తీసుకుని స్టేషన్ కు తరలించారు. ఉండవల్లిలో సీఎం చంద్రబాబు నివాసానికి కూతవేటు దూరంలోనే ఈ ఘటన చోటుచేసుకోవడం గమనార్హం.
