ఏపీ సీఎం చంద్రబాబు విజయవాడ నగరంలో ప్రకాశం బ్యారేజ్ వేదికగా అంతర్జాతీయ స్థాయిలో ఆంధ్రప్రదేశ్ రాష్ట్ర ప్రభుత్వం ఆధ్వర్యంలో జరుగుతున్న గ్లోబల్ స్టార్ ఎయిర్ షో పోటీలను తిలకించారు. ఈ సందర్భంగా చంద్రబాబు మాట్లాడుతూ సాంస్కృతిక కార్యక్రమాల పరంగా విభజనతో నష్టపోయిన ఆంధ్రరాష్ట్రంలో అనేక అద్భుతాలు చేస్తున్నామని రాష్ట్రాన్ని అగ్రస్థానంలో నిలబెట్టే విధంగా కృషి చేస్తున్నామని అన్నారు.
అంతేకాకుండా ఇటీవలే సోషల్ మీడియా సమ్మిట్, ఎఫ్ 1 బోట్ రేసింగ్ విజయవాడలో నిర్వహించామని వాటికి ప్రజల నుంచి మంచి స్పందన వస్తోందన్నారు. బోట్ రేసింగ్ పోటీలకు ఇంతటి అనువైన ప్రాంతం ప్రపంచంలో ఎక్కడా లేదని అభిప్రాయపడ్డారు.
మరియు ఆంధ్రప్రదేశ్ నూతన రాజధాని అమరావతి ప్రాంతంలో ఉన్న ప్రజలకు నిత్యం వినోదం పంచే సాంస్కృతిక కార్యక్రమాలను రూపొందిస్తున్నామన్నారు. విమానాల విన్యాసాలు చూస్తుంటే తనకూ పైలట్ కావాలన్న కోరిక కలుగుతుందని సరదాగా వ్యాఖ్యానించారు.
ప్రకాశం బ్యారేజ్ని ఇన్నాళ్లు సక్రమంగా ఉపయోగించలేదని... ఇక్కడ పర్యాటకాన్ని అభివృద్ధి చేసేందుకు అవకాశాలున్నాయని తెలిపారు. రాష్ట్ర ప్రజలు సహకరిస్తే ఏదైనా అద్భుతాలు చేయవచ్చని రానున్న రోజుల్లో ఆంధ్రప్రదేశ్ రాష్ట్రంలో తెలుగుదేశం పార్టీ ఆధ్వర్యంలో మరింత అభివృద్ధి జరుగుతుందని సీఎం చంద్రబాబు వ్యాఖ్యానించారు.