జగన్ పాదయాత్ర పూర్తి కావస్తోంది.. ఎన్నికలకు పూర్తిస్థాయిలో సన్నద్ధమవుతున్నారు. సార్వత్రిక ఎన్నికలు కూడా ఎదుర్కోవాల్సి రావడంతో పెద్ద కసరత్తే చేస్తున్నారు. అయితే దేశవ్యాప్తంగా అన్ని పార్టీలూ కూటముల లెక్కల్లో తేలుతున్నారు. ఈ నేపథ్యంలో జగన్ ఏ కూటమి వైపు వెళ్తారనేది ఆసక్తి కలిగిస్తున్న అంశం. ఇంతకూ జగన్ యూపీఏ వైపా? ఎన్డీఏ వైపా? కేసీఆర్ ఫెడరల్ ఫ్రంట్ వైపా?
ఏపీలో ప్రత్యేక హోదా అంశంపై మాట మార్చని నేత ఎవరైనా ఉన్నారంటే అది ఒక్క జగన్ మాత్రమే. చంద్రబాబు ప్రత్యేక హోదా అంశంపై టర్న్ లు తీసుకున్నారు కానీ.. జగన్ మాత్రం హోదావైపే మొదటి నుంచి మొగ్గుచూపుతూ వస్తున్నారు. హోదా ఇచ్చే పార్టీకే తమ మద్దతు ఉంటుందని స్పష్టం చేస్తూ వస్తున్నారు. ఈ నేపథ్యంలో వచ్చే ఎన్నికల తర్వాత ఆయన కాంగ్రెస్ కూటమి వైపు మొగ్గు చూపుతారేమో అనే అమందేహం రాకమానదు. ఎందుకంటే.. హోదా ముగిసిన అధ్యాయం అని బీజేపీ తేల్చి చెప్పేసింది. అధికారంలోకి వస్తే హోదా ఇస్తామని చెప్తోంది కాంగ్రెస్ పార్టీ. ఈ అంశం జగన్ కాంగ్రెస్ కూటమి వైపు వెళ్తారేమో అనే ఊహాగానాలను బలపరుస్తున్నాయి.
అయితే.. కాంగ్రెస్ కూటమి వైపు జగన్ వెళ్లడం కల్లే. ఎందుకంటే చంద్రబాబు ఆ కూటమిలో క్రియాశీలకంగా వ్యవహరిస్తున్నారు. కాంగ్రెస్ కూటమిలోకి పార్టీలన్నింటినీ లాక్కొచ్చే ప్రయత్నం చేస్తున్నారు. చంద్రబాబు యాక్టివ్ గా ఉన్న ఆ కూటమిలోకి వెళ్లే ఆలోచన జగన్ పొరపాటున కూడా చేయరు. అదే సమయంలో బీజేపీ నేతృత్వంలోని ఎన్డీయేకి వెళ్తారనుకోవడమూ పొరపాటే. ఎందుకంటే రాష్ట్రానికి సంబంధించి బీజేపీ తీవ్ర అన్యాయం చేసిందని అన్ని పార్టీలూ గగ్గోలు పెడ్తున్నాయి. హోదా ఇచ్చేది లేదని బీజేపీ తెగేసి చెప్పేసింది. అంతేకాక.. బీజేపీకి జగన్ తొత్తులా మార్రాని అధికార టీడీపీ విమర్శిస్తోంది. ఈ నేపథ్యంలో ఆయన బీజేపై వైపు వెళ్తే అది మరింత నష్టం చేకూర్చడం ఖాయం. అందుకే ఆ కూటమిలే చేరడమూ ఇప్పట్లో సాధ్యం కాదు. ఎన్నికల తర్వాత ఆలోచించవచ్చు.
