కలెక్టర్ల సదస్సు తొలిరోజునే ఆంధ్ర ప్రదేశ్ ముఖ్యమంత్రి జగన్మోహన్ రెడ్డి త్వరలోనే రచ్చబండ కార్యక్రమాన్ని ప్రారంభించనున్నట్లు ప్రకటించారు. రచ్చబండ కార్యక్రమం ద్వారా తండ్రి తరహాలోనే ప్రజా సమస్యలు ఎక్కడిక్కడే పరిష్కరించ వచ్చునని జగన్మోహన్ రెడ్డి భావిస్తున్నారు . రచ్చబండ కార్యక్రమాన్ని గతంలో దివంగత ముఖ్యమంత్రి వైఎస్ రాజశేఖర్ రెడ్డి చేపట్టాలనుకున్న విషయం తెల్సిందే . రెండవసారి అధికార పగ్గాలు చేపట్టిన తరువాత వైఎస్ పాలనను పరుగులు పెట్టించాలని వైఎస్ యోచించారు. దానికోసం రచ్చబండ కార్యక్రమాన్ని వేదికగా చేసుకోవాలని భావించారు . అయితే ఈ కార్యక్రమం ప్రారంభోత్సవానికి వెళ్తూ ఆయన హెలికాఫ్టర్ ప్రమాదానికి గురయ్యారు .
వైఎస్ రాజశేఖర్ రెడ్డి తాను ఏ కార్యక్రమాన్ని చేపట్టినా సెంటిమెంట్ గా రంగారెడ్డి జిల్లా లోని చేవెళ్ల నుంచి ప్రారంభించేవారు . కానీ రచ్చబండ కార్యక్రమాన్ని చిత్తూరు నుంచి ప్రారంభించాలని నిర్ణయించారు. ఆ రోజు వాతావరణం సరిగా లేకపోవడం తో , హెలికాఫ్టర్ లో ముఖ్యమంత్రి ప్రయాణానికి ఏ టి సి అధికారులు అభ్యంతరం చెప్పినట్లు కథనాలు వెలువడ్డాయి . వైఎస్ మాత్రం వారి అభ్యంతరాన్ని పెద్దగా పరిగణలోకి తీసుకోలేదని, దానికి కారణం లేకపోలేదని వైఎస్ సన్నిహితులు అంటుంటారు . తన మనస్సు నుంచి పుట్టుకొచ్చిన రచ్చబండ కార్యక్రమాన్ని ప్రారంభించాలన్న ధృడసంకల్పం వల్లే ఆయన ప్రతికూల వాతావరణ పరిస్థితులను కూడా ఖాతరు చేయకుండా చిత్తూరుకు పయనమై , ప్రమాదానికి గురయ్యారని చెబుతుంటారు .
వైఎస్ రాజశేఖర్ రెడ్డి తన ప్రభుత్వ హయం లో ఏదైతే సంకల్పం తో రచ్చబండ కార్యక్రమాన్ని చేపట్టాలని భావించారో, ముఖ్యమంత్రి జగన్మోహన్ రెడ్డి సైతం ఎక్కడిక్కడే ప్రజాసమస్యల పరిష్కారమే లక్ష్యంగా రచ్చబండ కార్యక్రమాన్ని చేపట్టాలని నిర్ణయించినట్లు తెలుస్తోంది.
