ట్రాఫిక్ ఉల్లంఘలకు పాల్పడేది ఎవరైనా వారికీ జరిమానాలు తప్పడం లేదు . అది మంత్రులైన , పోలీసు అధికారులైన, నగర మేయర్ అయినా జరిమానా విధించాలంటూ సామాన్యులు సోషల్ మీడియాను ఆశ్రయిస్తున్నారు . దాంతో విధిలేని పరిస్థితుల్లో పోలీసులు, ట్రాఫిక్ ఉల్లంఘనలకు పాల్పడిన వారికి జరిమానాలు విధించిన సంఘటనలు పలుసార్లు చోటు చేసుకున్నాయి. తాజాగా అటువంటి ఘటనే సంగారెడ్డి జిల్లా కేంద్రం లో చోటు చేసుకుంది . సంగారెడ్డి ప్రభుత్వ ఐటీఐ కాలేజీ సమీపంలో ఇటీవల పోలీసులు డిపార్ట్‌మెంట్ వాహనాన్ని రాంగ్ రూట్లో వెళ్ళింది . దీంతో అక్కడే ఉన్న ఓ వ్యక్తి ఫొటో తీసి, సోషల్ మీడియాలో అప్‌లోడ్ చేశాడు.
దీంతో ఆ ఫొటో సోషల్ మీడియా లో వైరల్‌గా మారింది. ట్రాఫిక్ చలాన్ల పేరుతో సామాన్యుల నడ్డి విరుస్తున్న పోలీసులు దీనికేం సమాధానం చెబుతారంటూ నెటిజన్లు ప్రశ్నించారు. పోలీసులకు కూడా ఫైన్ విధించాలని డిమాండ్ చేశారు. చివరికి ఈ ఫొటో పోలీసుల దృష్టికి రావడంతో సెప్టెంబర్ 3న ఫైన్ విధిస్తూ ఈ చలాన్ వెబ్‌సైట్‌లో పెట్టారు. అయితే తెలంగాణలో కొత్త మోటార్ వెహికిల్ చట్టం అమల్లోకి రాకపోవడంతో రూ. 1135 చలానా విధించారు. రాంగ్ రూట్లో ప్రయాణించిన పోలీస్ వాహనం డీజీపీ పేరుతో రిజిస్టరై ఉండటంతో ఆయనకు ఫైన్ వేసినట్లు పోలీసులు తెలిపారు. అయితే ఈ చలానాను వెంటనే చెల్లించినట్లు తెలుస్తోంది.
దేశవ్యాప్తంగా రోడ్డు ప్రమాదాలను నివారించడానికి కేంద్ర ప్రభుత్వం ఇటీవలే కొత్త మోటార్ వాహన చట్టాన్ని రూపొందించిన విషయం తెలిసిందే. ఈ చట్టం ద్వారా ట్రాఫిక్ నిబంధనలు ఉల్లంఘించే వారిపై విధించే జరిమానాల మొత్తాన్ని కేంద్రం భారీగా పెంచింది. అయితే, ఈ చట్టంపై వాహనదారులు తీవ్ర ఆగ్రహం వ్యక్తం చేస్తున్నారు. ముఖ్యంగా హైదరాబాద్‌లో రోడ్లు దారుణంగా ఉన్నాయనీ, వాటి గురించి పట్టించుకోవడానికి ప్రభుత్వ అధికారులకు, ప్రభుత్వానికి తీరిక లేదుగానీ ఉల్లంఘనల పేరుతో భారీగా ట్రాఫిక్ చలానాలు పెంచుతారా..? అంటూ తీవ్ర విమర్శలు చేస్తున్నారు.
