గర్భగుడిలోని విగ్రహాలతో సహా అన్ని రెండుగా ఉండి.. చరిత్రలో ఓ స్థానం సంపాదించుకున్న ఆ దేవాలయంలో.. వారం రోజుల నుంచి ఓ వింత చోటు చేసుకుంటోంది. ఎక్కడి నుంచి వస్తున్నాయో తెలియదు కానీ నీరు ధారాళంగా ఉబికి పైకి వస్తున్నాయి. ఇంతకీ ఎక్కడ ఆ ఆలయం.. బండరాయి నుంచి వస్తున్న నీటికి కారణమేంటో ఏ సారి పరిశీలిస్తే....!
నల్గొండ జిల్లా చండూరులో దక్షిణ కాశీగా వెలుగొందిన తుమ్మలపల్లి గ్రామంలో శ్రీ పార్వతి జడల రామలిగేశ్వర స్వామి దేవాలయం చరిత్ర అంతా విచిత్రంగా ఉంటుంది. ఆలయంలో రెండు గోపురాలు, రెండు ధ్వజస్థంబాలు, రెండు కళ్యాణ మండపాలు, రెండు కోనేరులు, రెండు నంది విగ్రహాలు అంతేకాక, గర్భగుడిలో విగ్రహాలు సైతం రెండుగా ఉంటాయి. ఇలా ఆలయంలో అన్ని రెండుగా ఉండడం ఇక్కడి ప్రత్యేకత అని చెబుతుంటారు స్థానికులు.
కాకతీయుల కాలంలో నిర్మించిన ఈ దేవాలయం అతి పెద్ద బండరాయిపై ఉంటుంది. దీంతో అక్కడ చుక్క నీరు కూడా ఉండదు. కానీ వారం రోజుల నుంచి అక్కడో వింత చోటు చేసుకుంది. గుట్టపై ఉన్న బండ రాయికి పడిన రంధ్రాల నుంచి నీరు ఉబికి ధారగా వస్తుంది. నీరు రావడానికి ఎలాంటి ఆనవాళ్లు లేని అక్కడికి నీరు రావడం అంతు చిక్కని ప్రశ్నగా ఉంది.
