ముఖ్యమంత్రి జగన్ అధ్యక్షతన జరిగే ఈ సమావేశంలో పలు కీలకాంశాలపై చర్చ జరగనుంది. నవరత్నాల్లోని కీలకమైన సంక్షేమ పథకాల అమలు కోసం గ్రీన్ సిగ్నల్ ఇవ్వనుంది. వైఎస్ఆర్ ఆసరా పథకంలో భాగంగా చేనేత కుటుంబాలకు ఆర్థిక సాయం అందించే అంశంపై రాష్ట్ర కేబినెట్ నిర్ణయం తీసుకోనుంది. పథకాన్ని ఏ విధంగా అమలు చేయాలనే అంశంపై ప్రధానంగా చర్చించనుంది. మత్స్యకారుల సంక్షేమ కోసం ... చేపల వేట నిషేధ సమయంలో ఇచ్చే మొత్తాన్ని పది వేలకు పెంచే అంశంపై కూడా మంత్రివర్గం చర్చించి నిర్ణయం తీసుకోనుంది. గతంలో మత్స్యకారులకు రూ. 4500 చెల్లించిన ప్రభుత్వం...ప్రస్తుతం పరిహారాన్ని 10 వేలకు పెంచాలని నిర్ణయించింది. ఈ అంశంపై కేబినెట్ ఆమోదం తెలిపిన అనంతరం ప్రభుత్వం ఆదేశాలు జారీ చేయనుంది. మొత్తం 15 అంశాలతో కూడిన అజెండాపై రాష్ట్ర మంత్రివర్గం చర్చించి నిర్ణయాలు తీసుకోనుంది.
ఇక డ్వాక్రా మహిళల కోసం గతంలో వెలుగు పేరుతో చేపట్టిన పేదరిక నిర్మూలన పథకాన్ని వైఎస్ఆర్ క్రాంతి పథంగా మార్చాలని ప్రభుత్వం భావిస్తోంది. ఇక ఇప్పటికే తీసుకున్న కొన్ని నిర్ణయాలను కూడా కేబినెట్ రాటిఫై చేయనుంది. వ్యవసాయ మిషన్ సమావేశంలో వైఎస్సార్ రైతు భరోసా పథకానికి వేయి రూపాయల మేర పెంచుతూ నిర్ణయం తీసుకున్నారు. దీన్ని కేబినెట్ రాటిఫై చేయనుంది. ఇక ఔట్ సోర్సింగ్ ఉద్యోగాల్లో బీసీ, ఎస్సీ, ఎస్టీ, మైనార్టీలకు 50 శాతం రిజర్వేషన్లు అమలు చేయాలని ప్రభుత్వం నిర్ణయించుకుంది. దీని కోసం ప్రత్యేకంగా ఔట్ సోర్సింగ్ కార్పొరేషన్ ఏర్పాటు చేయాలని సీఎం జగన్ ఆదేశించిన క్రమంలో.. ఔట్ సోర్సింగ్ కార్పొరేషన్ ఏర్పాటుకు నేటి మంత్రివర్గ భేటీలో గ్రీన్ సిగ్నల్ లభించనుంది. వ్యవసాయ కమిషన్ సమావేశంలో మిల్లెట్, పల్సెస్, ప్యాడీ బోర్డులను ఏర్పాటు చేయటం ద్వారా ఆయా రంగాల్లో అభివృద్ధి కోసం ప్రత్యేక శ్రద్ధ పెట్టవచ్చన్న ప్రతిపాదన వచ్చింది. దీనికి సీఎం జగన్ ఆమోదం లభించటంతో ఈ బోర్డుల ఏర్పాటు అంశం మంత్రి వర్గ భేటీలో చర్చకు రానున్నట్టు తెలుస్తోంది.
పాఠశాలల అభివృద్ధికి 'మన బడి నాడు-నేడు' పేరుతో ప్రత్యేకంగా ఓ పథకాన్ని రూపొందించాలని ప్రభుత్వం నిర్ణయించింది. దీనిపైనా కేబినెట్ లో చర్చించనున్నట్టు సమాచారం.త్వరలోనే స్థానిక సంస్థల ఎన్నికలు నిర్వహించనున్న దృష్ట్యా రిజర్వేషన్ల అంశంపై కూడా కేబినెట్ లో చర్చించే అవకాశం కనిపిస్తోంది. సుప్రీం కోర్టు మార్గదర్శకాల మేరకు స్థానిక సంస్థల ఎన్నికల్లో 50 శాతం మించకుండా రిజర్వేషన్లను అమలు చేయాల్సి ఉంది. ప్రస్తుతం స్థానిక సంస్థల్లో రిజర్వేషన్లు 59.5 శాతంగా ఉండటంతో దీన్ని కుదించే అంశంపై కూడా కేబినెట్ లో చర్చించి నిర్ణయం తీసుకునే అవకాశం కనిపిస్తోంది.వివాదమవుతున్న పోలవరం ప్రాజెక్టు, రాజధాని నిర్మాణం, పీపీఏల వంటి అంశాలపై మంత్రివర్గంలో చర్చ జరిగే అవకాశాలున్నట్టు తెలుస్తోంది. ఇక కొత్త ఇసుక విధానం గురించి సీఎం జగన్ మంత్రుల వద్ద ప్రస్తావించే సూచనలు కనిపిస్తున్నాయి.
