భారత జట్టులోకి ఎంపికైన కుర్రాళ్లకి బుధవారం మొహాలిలో కఠిన పరీక్ష ఎదురుకానుంది. దక్షిణాఫ్రికాతో ఈరోజు రాత్రి 7 గంటలకి రెండో టీ20 మ్యాచ్ ప్రారంభంకానుండగా.. వచ్చే ఏడాది టీ20 ప్రపంచకప్ నేపథ్యంలో వీలైనంత త్వరగా సత్తా నిరూపించుకోవాలని కెప్టెన్ విరాట్ కోహ్లీ జట్టులోని కుర్రాళ్లని ఆదేశించాడు. ముఖ్యంగా.. ఇటీవల వెస్టిండీస్ పర్యటనలో విఫలమైన యువ వికెట్ కీపర్ రిషబ్ పంత్‌పై ఇప్పుడు అందరి దృష్టి నిలిచింది. ఈ టీ20 సిరీస్‌లో అతను విఫలమైతే.. తన స్థానాన్ని ఇషాన్ కిషన్ లేదా సంజు శాంసన్‌‌కి వదులుకోవాల్సి వస్తుంది. ధర్మశాల వేదికగా గత ఆదివారం జరగాల్సిన తొలి టీ20 మ్యాచ్ వర్షం కారణంగా కనీసం ఒక బంతి కూడా పడకుండానే రద్దయిన విషయం తెలిసిందే.
నాలుగేళ్ల తర్వాత భారత్ పర్యటనకి వచ్చిన దక్షిణాఫ్రికా జట్టు విజయంతో టూర్‌ని ఆరంభించాలని ఆశిస్తోంది. ఇండియాలో ఇప్పటి వరకూ భారత్‌తో ఆడిన అన్ని టీ20 మ్యాచ్‌ల్లోనూ సఫారీలు గెలుపొందారు. ఈ నేపథ్యంలో.. వారికి ఓటమి రుచి చూపాలని టీమిండియా ఆశిస్తోంది. ఏబీ డివిలియర్స్, హసీమ్ ఆమ్లా రిటైర్మెంట్‌తో ఢీలాపడిన సఫారీలు ఏ మేరకు కోహ్లీసేనకి పోటీనిస్తారో..? చూడాలి. ఆ జట్టు కొత్త కెప్టెన్ డికాక్ నాయకత్వంలో మొదటి టీ20 ఆడబోతోంది.
భారత జట్టులో ఓపెనర్ శిఖర్ ధావన్ పేలవ ఫామ్‌తో నిరాశపరుస్తుండగా.. మిడిలార్డర్‌లో ఎవరికి అవకాశం దక్కనుంది..? అనేదానిపై ఉత్కంఠ నెలకొంది. శ్రేయాస్ అయ్యర్, మనీశ్ పాండే, కేఎల్ రాహుల్ తమ అదృష్టాన్ని పరీక్షించుకోనున్నారు. ఇక బౌలింగ్ విభాగంలో నవదీప్ షైనీ, రాహుల్ చాహర్, వాషింగ్టన్ సుందర్, ఖలీల్ అహ్మద్ బ్రేక్ కోసం ఎదురుచూస్తున్నారు.
టీ20ల్లో మొత్తంగా ఇప్పటి వరకూ 13 మ్యాచ్‌ల్లో భారత్, దక్షిణాఫ్రికా జట్లు తలపడగా.. ఇందులో ఏకంగా 8 మ్యాచ్‌ల్లో టీమిండియా విజయం సాధించింది. ఇక మిగిలిన ఐదు మ్యాచ్‌ల్లో సఫారీలు గెలుపొందారు. అయితే.. సీనియర్ ఫాస్ట్ బౌలర్లు జస్‌ప్రీత్ బుమ్రా, భువనేశ్వర్ కుమార్‌లు జట్టులో లేకపోవడంతో భారత బౌలింగ్ విభాగం అనుభవలేమితో కనిపిస్తోంది.భారత టీ20 జట్టు: విరాట్ కోహ్లి (కెప్టెన్), రోహిత్ శర్మ (వైస్ కెప్టెన్), కేఎల్ రాహుల్, శిఖర్ ధావన్, శ్రేయాస్ అయ్యర్, మనీశ్ పాండే, రిషబ్ పంత్ (వికెట్ కీపర్), హార్దిక్ పాండ్య, రవీంద్ర జడేజా, కృనాల్‌ పాండ్య, వాషింగ్టన్ సుందర్, రాహుల్ చాహర్, ఖలీల్ అహ్మద్, దీపక్ చాహర్, నవదీప్ షైనీదక్షిణాఫ్రికా టీ20 జట్టు: డికాక్ (కెప్టెన్, వికెట్ కీపర్), దుస్సేన్ (వైస్ కెప్టెన్), బవుమా, జూనియర్ డాలా, బోర్న్ పోర్టుయిన్, హెండ్రిక్స్, డేవిడ్ మిల్లర్, అన్రిచ్, ఫెహ్లుక్వాయో, పిట్రోరియస్, కగిసో రబాడ, షంషీ, స్మట్స్
