ప్రపంచ మార్కెట్లో మరొక కొత్త  ఫోల్డబుల్ స్మార్ట్ ఫోన్ ను లాంచ్ చేశారు .ఇప్పటికే  శామ్ సాంగ్ , మోటొరోలా  ఫోల్డబుల్ స్మార్ట్ ఫోన్లను  లాంచ్ చేసాయి. అయితే మార్కెట్లో వీటి ధర రూ.లక్షకు పై మాటే. భవిష్యత్తులో ఏ సంస్థ ఫోల్డబుల్ స్మార్ట్ ఫోన్ ను లాంచ్ చేయనున్నా దాని ధర కచ్చితంగా అధికంగానే ఉండనుంది. కానీ ఎస్కోబార్ అనే సంస్థ కేవలం 349 డాలర్లకే(సుమారు రూ.25,000) ఫోల్డబుల్ స్మార్ట్ ఫోన్ ను విక్రయించనుంది. ఎస్కోబార్ ఫోల్డ్ 1 పేరిట ఈ ఫోన్ మార్కెట్లో లాంచ్ అయింది.  

ఇందులో 7.8 అంగుళాల ఫుల్ హెచ్ డీ+ అమోఎల్ఈడీ(AMOLED) స్క్రీన్ ను అందించారు. స్క్రీన్ పిక్సెల్స్ 1920x1444గా ఉండగా, ఫోన్ ను పూర్తిగా తెరిచినప్పుడు యాస్పెక్ట్ రేషియో 4:3గా ఉంది. కెమెరాల విషయానికి వస్తే ఇందులో రెండు కెమెరాలను అందించారు. వీటి సామర్థ్యం 16 మెగా పిక్సెల్, 20 మెగా పిక్సెల్ గా ఉంది.  క్వాల్ కాం స్నాప్ డ్రాగన్ 8 సిరీస్ ప్రాసెసర్ ను అందించారు. ఆక్టాకోర్ 2.8 గిగాహెర్ట్జ్ క్లాక్ స్పీడ్ ద్వారా ఇది పనిచేస్తుంది. బ్యాటరీ విషయానికి వస్తే 4000 ఎంఏహెచ్ బ్యాటరీని కెపాసిటీ  అందించారు. యూఎస్ బీ టైప్-సీ, డ్యూయల్ సిమ్ ఫీచర్లు కూడా ఇందులో ఉన్నాయి. వీటితో పాటు స్టోరేజ్ పెంచుకోవడానికి అదనంగా మైక్రో ఎస్ డీ స్లాట్ , దీని ద్వారా 256 జీబీ వరకు స్టోరేజ్ ను పెంచుకోవచ్చు. సెక్యూరిటీ కోసం ఫింగర్ ప్రింట్ ఫీచర్ కూడా  ఉంది. బరువు 320 గ్రాములు.

స్మార్ట్ ఫోన్ లో రెండు వేరియంట్లు అందుబాటులో ఉన్నాయి. 6 జీబీ ర్యామ్ + 128 జీబీ స్టోరేజ్ వేరియంట్ ధర 349 డాలర్లు(సుమారు రూ.25,000)గా నిర్ణయించగా, మరో వేరియంట్ అయిన 8 జీబీ ర్యామ్ + 512 జీబీ స్టోరేజ్ వేరియంట్ ధర 499 డాలర్లు(సుమారు రూ.35,800)గా ఉంది. కేవలం గోల్డ్ కలర్ లో మాత్రమే ఈ ఫోన్ లభించనుంది. మొదటి సేల్ లో వీరు లక్ష ఫోన్లను విక్రయించనున్నారు.
  
అసలు ఈ సంస్థ ఎవరిది? కొలంబియాకు చెందిన డ్రగ్ మాఫియా లీడర్ పాబ్లో ఎస్కోబార్ తమ్ముడైన రాబర్టో ఎస్కోబార్ కు చెందిన కంపెనీయే ఇది. నెట్ ఫ్లిక్స్ లో ప్రసారమయ్యే ‘నార్కోస్’ వెబ్ సిరీస్ ను చూసిన వారికి ఇతని గురించి ప్రత్యేకంగా పరిచయం చేయాల్సిన అవసరం లేదు. అందుకే కాబోలు వీరు ఈ స్మార్ట్ ఫోన్ భద్రత విషయంలో ఎన్నో జాగ్రత్తలు తీసుకున్నారు. శాంసంగ్, యాపిల్ వంటి ఫోన్లను ప్రభుత్వాలు యాక్సెస్ చేయగలవు కానీ మా ఫోన్ ను ప్రపంచంలోని ఏ ప్రభుత్వం యాక్సెస్ చేయలేదు అని తెలిపారు.ఈ ఫోన్ లో ఉన్న డేటాను బ్లూటూత్ స్కాన్ చేయడం చాలా కష్టం. ఆర్ఎఫ్ఐడీ, మనకు తెలియకుండా జరిగే కమ్యూనికేషన్లను ఆపడానికి ఇందులో సన్నటి లోహపు తెరను అందించారు. ప్రపంచంలో సెక్యూరిటీకే ప్రాధాన్యమిచ్చే ఏ ఇతర కంపెనీ కూడా ఇన్ని జాగ్రత్తలు తీసుకుని ఉండదు. ఈ ఫోన్ ను ప్రపంచంలోని ఏ దేశానికైనా ఉచితంగా షిప్పింగ్ చేస్తామని అధికారిక వెబ్ సైట్ లో పేర్కొన్నారు.

మరింత సమాచారం తెలుసుకోండి: