ఈ వ్యోమగామి నడుస్తున్నది చంద్రుడి మీద కాదండోయ్. అవి రోడ్డుపై గుంతలు. మున్సిపాలిటీ అధికారుల కళ్లు తెరిపించేందుకు ఓ కళాకారుడు ఇలా ప్రయత్నించాడు. బెంగళూరు రోడ్లపై వ్యోమగామి ప్రత్యక్షమయ్యాడు. చంద్రుడి మీద నడుస్తున్నట్లే నెమ్మదిగా గాల్లో తేలిపోతున్నట్లుగా అతడు కదులుతున్నాడు. ఇదేదో జనాలను ఆకట్టుకోడానికో లేదా ‘చంద్రయాన్-2’ను ప్రచారం కోసం అనుకుంటే పొరపాటే. రోడ్లు ఎంత అధ్వాన్నంగా ఉన్నాయో తెలిపేందుకు అతడు చేసిన సృజనాత్మక ప్రయత్నం. అధికారులపై విసిన వ్యంగ్య బాణం.
బాదల్ నంజుందస్వామి అనే పెయింటర్ బెంగళూరు రోడ్ల దుస్థితిని అధికారుల దృష్టికి తీసుకెళ్లాలని భావించాడు. ఇందుకు 3డీ స్ట్రీట్ ఆర్ట్‌ను ఎంపిక చేసుకున్నాడు. ఈ సందర్భంగా వ్యోమగామి అవతారంలో గతుకుల రోడ్డుపై నడుస్తూ వీడియో రూపొందించాడు. అనంతరం ఆ వీడియోను సోషల్ మీడియాలో పోస్టు చేశాడు.
దీంతో వీడియో క్షణాల్లో వైరల్ అయ్యింది. ఇప్పటివరకు దీన్ని 4 లక్షల మందికి పైగా వీక్షించారు. 14 వేల మందికి పైగా షేర్ చేసుకున్నారు. నంజుందస్వామి క్రియేటివిటీకి నెటిజనులు ప్రశంసలు కురిపిస్తున్నారు. నంజుందస్వామి గతంలో కూడా బెంగూళూరు రోడ్ల సమస్యలను ఇదే మార్గంలో అధికారుల దృష్టికి తీసుకెళ్లాడు. రోడ్డు మధ్యలో మొసలి బొమ్మను పెట్టి ఆకట్టుకున్నాడు.
