ప్రపంచంలో ప్రతి ఒక్కరూ సక్సెస్ సాధించాలనే కష్టపడతారు. మనలో ఉండే కొన్ని లక్షణాలే మన సక్సెస్ కైనా, ఫెయిల్యూర్ కైనా కారణమవుతాయి. కొన్ని లక్షణాలను అలవరచుకుంటే మనకు విజయం సులభంగా దక్కే అవకాశం ఉంటుంది. ఈ ప్రపంచంలో ఉండే ప్రతి ఒక్కరికీ కొన్ని ప్రత్యేకమైన నైపుణ్యాలు ఉంటాయి. మనలో ఉన్న నైపుణ్యాలను పెంపొందించుకుంటూ మనం ముందడుగు వేయాలి.
కొన్ని సందర్భాల్లో మనలో లేని నైపుణ్యాలు ఇతరులలో కనిపిస్తే మనం అసూయ పడుతూ ఉంటాం. అసూయ మనకు కీడు చేస్తుంది తప్ప మేలు చేయదు. ప్రతి వ్యక్తి తనకంటూ కొన్ని ప్రత్యేకతలను కలిగి ఉంటాడు. అందువల్ల మనల్ని మనం ఎప్పుడూ ఇతరులతో పోల్చుకోకూడదు. మనలో ఉన్న నైపుణ్యాలను, సామర్థ్యాలను పెంచుకుంటూ ముందడుగులు వేయాలి. మన ఆత్మవిశ్వాసాన్ని మనమే ధృఢపరచుకోవాలి.
మనలో లేని నైపుణ్యాలు ఇతరుల్లో ఉంటే వారి నుంచి ఆ నైపుణ్యాలను అలవరచుకోవడానికి ప్రయత్నించాలి. నైపుణ్యాలను మెరుగుపరచుకుంటూ మనకు మనమే సాటి అనేలా ముందడుగులు వేయాలి. చాలా మంది విజయసాధనలో ఇదే చివరి ప్రయత్నం అని చెబుతూ ఉంటారు. విజయం సాధించడం కోసం పనిని ప్రారంభించడానికి నిర్దిష్టమైన సమయం కోసం వేచి ఉండాల్సిన అవసరం లేదు.
లక్ష్య సాధనలో మనుషులకు ఎన్నో ఒడిదుడుకులు ఎదురవుతాయి. అందువల్ల సానుకూల ఆలోచనలను మనసులో పెంపొందించుకోవాలి. విజయాలు సాధించిన వ్యక్తుల జీవిత చరిత్రలను తెలుసుకుని వారిని స్పూర్తిగా తీసుకుంటూ మనం ఇతరులకు స్పూర్తిగా నిలవాలి. అపజయాలు ఎదురైనా లక్ష్యాన్ని విస్మరించకుండా ముందడుగులు వేయాలి. మిమ్మల్ని చూసి విజయం కూడా భయపడి దరికి చేరేలా పట్టుదలతో కృషి చేయాలి. ఇతరుల వైఫల్యాలను మన విజయాలకు గుణపాఠాలుగా మార్చుకోవాలి. అవతలి వ్యక్తుల వైఫల్యాలపై తక్కువగా ఆలోచించాలి. అవతలి వ్యక్తుల వైఫల్యాలకు గల కారణాలు తెలుసుకుని పరిష్కారం కోసం కృషి చేయాలి. ఇతరులను అనవసరంగా నిందించడం మానుకోవాలి. మనలోని శక్తిసామర్థ్యాలను పెంచుకుంటూ లక్ష్యం కోసం కృషి చేస్తే విజయం సులభంగా సొంతమవుతుంది.
