ప్రతి ఒక్కరి జీవితంలో సక్సెస్ కు ఎంతో ప్రాధాన్యత ఉంటుంది. ఎవరైతే సక్సెస్ సాధిస్తారో వారికి సమాజంలో ప్రత్యేక గౌరవం ఉంటుంది. అదే సమయంలో ఫెయిల్యూర్ ను చవిచూసిన వారికి సమాజంలో, ఇంట్లో అవమానాలు ఎదురవుతూ ఉంటాయి. కొందరు కష్టపడినా విజయం సాధించలేక ఫెయిల్ అవుతూ ఉంటారు. మరికొందరు మాత్రం నిర్లక్ష్యం వల్ల సక్సెస్ కాలేక పోతూ ఉంటారు.
మనం చేసే కొన్ని పొరపాట్లే మన ఫెయిల్యూర్ కు కారణమవుతూ ఉంటాయి. జీవితంలో సక్సెస్ సాధించాలనుకునే ప్రతి ఒక్కరూ లక్ష్యాన్ని నిర్దేశించుకుంటారు. ఈ లక్ష్యాన్ని సాధించే క్రమంలో ఎవరైతే ఫలితం దక్కే చివరి నిమిషం వరకు కష్టపడతారో వారు విజేతలుగా నిలుస్తున్నారు. మరికొందరిలో ఎంచుకున్న లక్ష్యాన్ని సాధించే సత్తా ఉన్నా ఫెయిల్ అవుతూ ఉంటారు. లక్ష్యాన్ని ఎంచుకున్న తరువాత విజయం సాధించటానికి నూటికి నూరు శాతం శ్రమించాలి.
లక్ష్యాన్ని నిర్దేశించుకున్న తరువాత మనలోని బలాలను, బలహీనతలను గుర్తించి బలహీనతలను అధిగమించడానికి ప్రయత్నించాలి. లక్ష్యాన్ని సాధించే క్రమంలో లక్ష్యం సాధించటానికి ఉపయోగపడని... అనవసరంగా సమయం వృథా కావడానికి కారణమైన వాటికి దూరంగా ఉండాలి. లక్ష్యం కోసం ప్రయత్నించే సమయంలో సోషల్ మీడియాకు దూరంగా ఉంటే మరీ మంచిది. అదే సమయంలో లక్ష్యాన్ని సాధించడంలో ఎదురయ్యే ఇబ్బందులను గమనించాలి.
ఆ ఇబ్బందులను అధిగమించడానికి ఇతరుల సహాయసహకారాలు తీసుకోవాలి. లక్ష్యాన్ని సాధించడానికి కావాల్సిన బలాలను పెంచుకోవాలి. అప్పటికే మనం ఎంచుకున్న లక్ష్యం విషయంలో విజయం సాధించిన వారి నుంచి తగిన సలహాలు, సూచనలు తీసుకోవాలి. పోటీ పరీక్షలకు సిద్ధమయ్యే వారు మాక్ టెస్టులు ఎక్కువగా రాయడానికి ప్రాధాన్యత ఇవ్వాలి. అప్పుడే ఎలాంటి ప్రశ్నలకు సరిగ్గా జవాబులు రాస్తున్నామో ఎలాంటి ప్రశ్నల విషయంలో తప్పు సమాధానాలను ఎంచుకుంటున్నామో అర్థమవుతుంది. ఈ విధంగా పొరపాట్లను ఎప్పటికప్పుడు సరిదిద్దుకుంటూ శ్రమిస్తే విజయం తప్పక సొంతమవ్తుంది.
