ప్రస్తుత సమాజంలో ప్రతి ఒక్కరూ ఏదో ఒక లక్ష్యాన్ని కలిగి ఉంటారు. ఆ లక్ష్యాన్ని సాధించడం కోసం ఎంతో కృషి చేయాలని అనుకుంటూ ఉంటారు. కానీ కొంత కాలం గడచిన తరువాత లక్ష్యం పట్ల పట్టు సడలుతుంది. ఇలా ఎందుకు జరుగుతుందంటే ప్రతి మనిషికి లక్ష్య సాధనలో కష్టాలు, కన్నీళ్లు, అడ్డంకులు ఎదురవుతాయి. అలాంటి సమయంలో ఆశించిన స్థాయిలో పనులు జరగవు. ఆ సమయంలో నిరాశానిస్పృహలకు లోనై చాలామంది పనులు మధ్యలోనే వదిలేస్తారు.
కానీ చరిత్ర విజేతలందరూ విజయం సాధించే ముందు గుండెలు పిండే కష్టాలను ఎదుర్కొన్నట్లు చెబుతోంది. ఓటమి పట్ల నిరుత్సాహం చెందడానికి నిరాకరించడమే వాళ్లు విజయం సాధించటానికి కారణమని సైకాలజిస్టులు సైతం అభిప్రాయపడుతున్నారు. పట్టుదల ఉంటే మాత్రమే ఏ పనిలోనైనా విజయం సాధించడం సాధ్యమవుతుంది. విజేతలు కూడా పొరపాట్లు చేస్తారు. కానీ ఆ పొరపాట్ల నుంచి గుణపాఠాలు నేర్చుకుని సక్సెస్ వైపు అడుగులు వేస్తారు.
జీవితంలో అననుకూల పరిస్థితులను కష్టపడైనా ఇష్టంతో అనుకూలంగా మార్చుకోవాలి. లక్ష్యసాధనలో ఎదురయ్యే అడ్డంకులు, కష్టాలు అతి సాధారణమని గుర్తుంచుకోవాలి. కార్యసాధన ప్రయత్నాలను ఎట్టి పరిస్థితుల్లోను ఆపకూడదు. సానుకూలంగా, నిర్మాణాత్మకంగా ప్రతిస్పందిస్తే మాత్రమే సులభంగా సక్సెస్ సాధించవచ్చు. కష్టాల్లో కూడా నిరాశ చెందకుండా ముందడుగులు వేస్తే సక్సెస్ తప్పక సొంతమవుతుంది.
ఏ వ్యక్తి జీవితంలోనైనా ఘన విజయానికి ముందు తాత్కాలికమైన ఓటమి తప్పకుండా ఎదురవుతుంది. ఓటమి ఎదురైన సమయంలో మనం తీసుకునే జాగ్రత్తలే మన విజయానికి కారణమవుతాయి. కష్టాల కడలిని ఈదుతూ ముందుకు దూసుకుపోతే సక్సెస్ సాధించడం సాధ్యమవుతుంది. లక్ష్యాన్ని చేరుకునే దారిలో ముందున్న సవాళ్లను గుర్తించి సక్సెస్ కోసం కష్టపడితే విజయం సులభంగా సొంతమవుతుంది. ఎప్పుడూ ప్రయత్నాన్ని వదలిపెట్టనని గట్టిగా నిర్ణయించుకోవడంతో పాటు ప్రతి సందర్భంలోను సమస్యకు తగినట్లు వ్యూహాన్ని మార్చుకుంటూ సక్సెస్ ను సొంతం చేసుకోవాలి.
