మనిషి జీవితం ఎంతో అమూల్యమైనది. కానీ నేటి యువత జీవితం యొక్క విలువను తెలుసుకోలేకపోతున్నారు. చిన్నచిన్న సమస్యలు ఎదురైతే ఆ సమస్యలకు భయపడి జీవితాన్ని నాశనం చేసుకుంటున్నారు. సమస్యలతో పోరాడలేక ఆత్మహత్య చేసుకుంటున్నారు. జీవితం విలువ, ప్రాణం విలువ ఈ కాలం యువతకు ఎందుకో అర్థం కావడం లేదు. చిన్నచిన్న ఫెయిల్యూర్స్ ను కూడా వాళ్లు తట్టుకోలేకపోతున్నారు.
జీవితంలో కష్టం వెనుకే సుఖం కూడా ఉంటుంది. భూప్రపంచంలో ప్రతి ఒక్కరికీ సమస్యలు ఉంటాయి. మనకంటూ ఏమీ లేకపోతే అలాంటి సమయాల్లో కొత్త అవకాశాలను సృష్టించుకోవాలి. ఆఖరి శ్వాస వరకు మన చేతిలోనే మన జీవితం ఉంటుంది. భవిష్యత్తుపై ఆశతో జీవితంలో శ్రమిస్తే ఎలాంటి పనిలోనైనా విజయం సొంతమవుతుంది. అలాంటి దృకధం కలిగిన వాళ్లు ఆలస్యంగానైనా సక్సెస్ ను సొంతం చేసుకుంటారు.
జీవితంలో అనేక సందర్భాల్లో అనేక సమస్యలు ఎదురవుతాయి. సమాజ పరిస్థితులను, సమయాన్ని బట్టి నడుచుకోకపోవడం వల్ల ఈ సమస్యలు మరింత ఎక్కువవుతాయి. అందువల్ల వీటిని బట్టి నడుచుకోవాలి. చాలామంది జీవితాలను చెడు స్నేహాలు నాశనం చేస్తూ ఉంటాయి. అలాంటి స్నేహాలకు దూరంగా ఉంటే సక్సెస్ సులభంగా సొంతమవుతుంది. జీవితంలో అధికం అనేది అత్యంత ప్రమాదకరం.
అధికమైన కోపం, అధికమైన కాంక్ష వల్ల జీవితంలో ప్రశాంతత ఉండదు. ఎవరైతే ఆశతో కష్టాన్ని నమ్ముకుని చిత్తశుద్ధితో ప్రయత్నం చేస్తారో వారికి సక్సెస్ సులభంగా సొంతమవుతుంది. ఏ పనిని అయినా మనం పూర్తిస్థాయిలో తెలుసుకున్న తరువాత మాత్రమే ప్రారంభించాలి. లేకపోతే ఆ పనిని మధ్యలోనే వదిలేయాల్సి ఉంటుంది. మనకు దేనిపై అమితమైన ఆసక్తి ఉంటుందో దాని కోసం శ్రమిస్తే సక్సెస్ తప్పక సొంతం చేసుకోవచ్చు. మనకంటూ సరైన లక్ష్యాన్ని నిర్దేశించుకుని ఆ లక్ష్యం సాధించే వరకు పట్టుదల వీడకుండా శ్రమిస్తే విజయం సాధించడం సాధ్యమవుతుంది.
