ప్రపంచం ఎప్పుడూ సక్సెస్ చుట్టే తిరుగుతుంది. సమాజంలో సక్సెస్ కు మాత్రమే విలువ ఉంటుంది. ఎవరైతే ఫెయిల్ అవుతారో వాళ్లను ఎవరూ పట్టించుకోరు. అందువల్ల చాలామంది విజయం సాధించడం కోసం అడ్డదారుల్లో ప్రయత్నిస్తూ ఉంటారు. కానీ అలా విజయం సాధించినా ఆ సక్సెస్ ను ఎక్కువ కాలం నిలుపుకోవడం వాళ్లకు సాధ్యం కాదు. ఏ పనిలోనైనా మనం విజయం సాధించాలంటే మొదట ఆ పనిని ప్రేమించాలి.
మనం ఏ పనిని ఐతే ఇష్టపడతామో ఆ పనిని సులువుగా చేయగలుగుతాం. ఆ పని చేసే క్రమంలో ఎలాంటి ఇబ్బందులు వచ్చినా సులువుగా అధిగమించగలుగుతాం. ఇష్టంతో పనులు చేస్తే సక్సెస్ తప్పక దరి చేరుతుంది. మనం ఎంచుకున్న లక్ష్యాన్ని సాధించడంతో పాటు తక్కువకాలంలోనే ఉన్నతస్థానాలకు ఎదిగే అవకాశం ఉంటుంది. ఇష్టంగా చేసే పనులు మనకు ఏ సమయంలోనైనా కష్టంగా అనిపించవు.
డిగ్రీ, ఇతర ఉన్నత చదువులు పూర్తైన తరువాత అందమైనా భవిష్యత్తు కోసం ఉద్యోగాన్ని వెతుక్కునే క్రమంలో, పోటీ పరీక్షలు రాసే సమయంలో నేటి యువత తీవ్ర ఒత్తిడికి లోనవుతున్నారు. కెరీర్లో విజయం ఎలా సాధించాలో అర్థం కాక గందరగోళానికి గురవుతూ ఉంటారు. తోటి స్నేహితులు సక్సెస్ సాధిస్తుంటే తమకు ఇంకా సక్సెస్ ఎందుకు సొంతం కాలేదని ఆందోళన పడుతూ ఉంటారు.
అలా కాకుండా మనం ఇష్టంతో ప్రయత్నిస్తే ఎంచుకున్న వాటిపై ఆసక్తి ఏర్పడుతుంది. ఆ ఆసక్తే మనల్ని విజయం వైపు నడిపిస్తుంది. మన ఆశయాలను, లక్ష్యాలను సాధించేలా చేసి ఇతరుల ఊహకు అందని స్థాయిలో నిలుపుతుంది. అందువల్ల శ్రమను నమ్ముకొని సక్సెస్ కోసం కష్టపడితే విజయం తప్పక దరి చేరుతుంది. అలా కాకుండా మనపై మనకే నమ్మకం లేకుండా ప్రయత్నం చేస్తే సక్సెస్ ఎప్పటికీ సొంతం కాదు.
