తెలంగాణలో వెటర్నరీ డాక్టర్ దారుణ హత్య దేశవ్యాప్తంగా సంచలనం సృష్టించిన విషయం తెలిసిందే. పెనుసంచలనానికి కారణమైన ఈ కేసులో నిందితులను హైదరాబాద్ పోలీసులు ఇప్పటికే అరెస్టు చేశారు. అయితే ఈ దారుణ ఘటనలో పోలీసుల వైఫల్యం స్పష్టంగా కనిపిస్తోందన్న విమర్శలు వస్తున్నాయి. వైద్యురాలి తల్లిదండ్రులు తమ బిడ్డ ఇంకా ఇంటికి రాలేదని పోలీస్ స్టేషన్‌కి వెళ్లి ఫిర్యాదు చేస్తే తక్షణ సాయం అందించకుండా.. అది తమ పరిధిలోనిది కాదంటూ పంపించి వేశారన్న ఆరోపణలున్నాయి. రెండు పోలీస్ స్టేషన్లు తిరిగాక కానీ పోలీసులు స్పందించలేదు. ఈ లోపు తీవ్ర సమయాభావం కావడంతో జరగాల్సిన నష్టం జరిగిపోయింది. ఒకవేళ పోలీసులు సకాలంలో స్పందించి ఉంటే తను ప్రాణాలతో అయినా మిగిలేదన్న అభిప్రాయాలు వ్యక్తమవుతున్నాయి.
ఆ మానవ మృగాలు ఆమెను 9.30 గంటలకు లాక్కెళ్లి.. 10.20 గంటల సమయంలో లారీలోకి ఎక్కించారు. అర్ధరాత్రి 2 గంటల సమయంలో పెట్రోల్ పోసి నిప్పంటించారు. వైద్యురాలి తల్లిదండ్రులు ఫిర్యాదు చేసేందుకు వచ్చిన సమయంలో పోలీస్ స్టేషన్ల చుట్టూ తిప్పకుండా సరిగ్గా స్పందించి ఉంటే పరిస్థితి మరోలా ఉండేదన్న వాదనలూ వినిపిస్తున్నాయి.
తెలంగాణలో జరిగిన దారుణ ఘటనతో ఏపీ పోలీసులు అప్రమత్తమయ్యారు. గుంటూరు అర్బన్ ఎస్సీ సంచలన నిర్ణయం తీసుకున్నారు. ఇకపై పోలీసు స్టేషన్ల పరిధితో నిమిత్తం లేకుండా బాధితుల నుంచి ఫిర్యాదులు స్వీకరించాలని కీలక ఆదేశాలు జారీ చేశారు. ఎవరైనా ఫిర్యాదు చేసేందుకు పోలీస్ స్టేషన్‌కు వస్తే స్టేషన్ పరిధితో సంబంధం లేకుండా ముందు బాధితులకు అండగా నిలబడాలని ఎస్పీ పీహెచ్‌డీ రామకృష్ణ ఆదేశించారు. అలాగే డయల్100 నంబర్ 24 గంటలూ అందుబాటులో ఉంటుందని.. బాధితులు వాట్సప్ నంబర్ 86888 31568కి కూడా సమాచారం ఇవ్వొచ్చని ఆయన సూచించారు.
అయితే ఇదేమీ కొత్త విధానమేమీ కాదు. అందుకు జీరో ఎఫ్‌ఐఆర్‌ ఎప్పటి నుంచో అందుబాటులో ఉంది. జీరో ఎఫ్‌ఐఆర్‌పై పెద్దగా అవగాహన లేకపోవడంతో కొందరు పోలీసులు తమ బాధ్యతల నుంచి తప్పించుకునేందుకు తమ పరిధి కాదని తప్పుదోవ పట్టిస్తున్నారు. నిజానికి.. బాధితుడు ఫిర్యాదు చేసేందుకు ఏ పోలిస్ స్టేషన్‌కి వెళ్లినా తప్పకుండా ఆ ఫిర్యాదు తీసుకోవాలి. మా పరిధి కాదు అని చెప్పడానికి వీల్లేదు. ఫిర్యాదు ఏ స్టేషన్ పరిధిలోకి వస్తుందో స్పష్టత కొరవడినప్పుడు.. ఎక్కడ ఫిర్యాదు చేస్తే అక్కడ జీరో ఎఫ్ఐఆర్‌గా నమోదు చేసి.. ఆ తరువాత సంబంధిత స్టేషన్ ఏదో తెలుసుకుని ఆ ఎఫ్ఐఆర్‌ను ఆ స్టేషన్‌కు పోలీసులే బదిలీ చేయాలి.
