బ్రిటన్‌ దేశంలోనే అత్యంత  ప్రమాదకరమైన నేరస్థులలో ఒకడిగా పేరొందిన జోసెఫ్ మెక్‌కాన్ అనే వ్యక్తికి న్యాయస్థానం 33 జీవిత ఖైదులను విధించింది. రెండు వారాల వ్యవధిలో 11 మంది మహిళలు, చిన్నారులపై రేప్ చేసిన అతడు జీవితంలో జైలు నుంచి బయటకు రాకుండా శిక్ష విధించింది. 34 ఏళ్ల జోసెఫ్.. 12 ఏళ్ల చిన్నారి నుంచి 71 ఏళ్ల పండు ముదుసలి వరకు.. వయోబేధాన్ని మరచి మరీ అత్యాచారాలకు పాల్పడ్డాడు. ఏప్రిల్ చివరి వారం నుంచి అతడు ఈ దురాగతాలను మొదలుపెట్టాడు.
 

జోసెఫ్‌కు జీవిత ఖైదు విధించిన లండన్ సెంట్ర్ క్రిమినల్ కోర్ట్ జడ్జి ఎడిస్.. తాను చేసిన నేరాల పట్ల అతడు ఏ మాత్రం పశ్చాతాపం వ్యక్తం చేయలేదని తెలిపారు. ‘ఇతరులను నీకు ఇష్టం వచ్చినట్టుగా వాడుకునే హక్కు నీకుందని భావిస్తున్నావు. ఇతరులు బతికేది కేవలం నీ కోరిక తీర్చడానికే అనుకుంటున్నావ్’ అని జోసెఫ్‌ను ఉద్దేశించి జడ్జి ఘాటైన వ్యాఖ్యలు చేశారు. అతణ్ని సైకోగా అభివర్ణించారు. అతడు కనీసం 30 ఏళ్లు జైళ్లోనే గడపాలన్నారు.
 

ఏప్రిల్ 21న రాత్రి సమయంలో నైట్ క్లబ్ నుంచి తిరిగి వెళ్తున్న 19 ఏళ్ల యువతిని  కత్తితో బెదిరించి ఆమె ఇంటికే తీసుకెళ్లిన ఈ దుర్మార్గుడు.. ఆమెను రేప్ చేశాడు. అతడి గురించి బాధితురాలు పోలీసులకు ఫిర్యాదు ఇచ్చింది. కానీ అతడు పోలీసుల కళ్లు గప్పి తిరుగుతూ మరిన్ని దారుణాలకు పాల్పడ్డాడు. అలా అమ్మాయిలను ఎత్తుకెళ్లి రేప్ చేయడంతోపాటు.. పరిచయం ఉన్న ఓ మహిళ ఇంటికి వెళ్లి.. ఆమెను కట్టేసి.. ఆమె కళ్ల ముందే 17, 12 ఏళ్ల వయసున్న ఆమె పిల్లలపై జోసెఫ్ అత్యాచారాలు చేశాడు. 25 ఏళ్ల వయసున్న ఓ యువతిని ఎత్తుకెళ్లి.. 14 గంటలపాటు ఆమెకు నరకం చూపాడు.
 

37 రేప్, లైంగిక హింస, కిడ్నాప్ కేసులను ఎదుర్కొంటున్న జోసెఫ్‌కు న్యాయమూర్తి 33 జీవితకాల శిక్షలను విధించారు. జోసెఫ్‌ యూకేలోని మోస్ట్ డేంజరస్ క్రిమినల్స్‌లో ఒకడని డిటెక్టివ్ చీఫ్ ఇన్స్‌పెక్టర్ కాథరినే గుడ్‌విన్ అభిప్రాయపడ్డారు. ప్రొబేషనరీ ఎర్రర్ కారణంగా జైలు నుంచి బయటకొచ్చిన జోసెఫ్ ఈ దురాగతాలకు పాల్పడ్డాడు. కాగా 1770 నుంచి 1830 మధ్య ఇంగ్లాండ్, వేల్స్‌లో 35 వేల మందికి మరణశిక్ష విధించగా 7 వేల మందికి  దానిని అమలు చేశారు. కానీ 1965 నుంచి బ్రిటన్‌లో మరణ శిక్షను రద్దు చేశారు. 2004లో యూరోపియన్ కన్వెన్షన్ ఆన్ హ్యూమన్ రైట్స్‌లో యూకే చేరింది. ఈ కన్వెన్షన్‌లో కొనసాగుతున్నంత కాలం యూకే మరణ శిక్షను విధించదు. అందువల్ల ఇంత పెద్ద నేరం చేసిన అతడికి ఉరి శిక్ష విధించలేదు. 

 

మరింత సమాచారం తెలుసుకోండి: