మీడియా మీద యాంటీగా ఒక సినిమా తీయడానికి చాలా గట్స్ కావాలి. మీడియా ని తూర్పారబెట్టి అందులో జరుగుతున్న దారుణాలూ , ఘోరాలూ చూపించాలి అంటే ఆ డైరెక్టర్ కి చాలా సీన్ ఉండాలి. ఎక్కడైనా తేడా వచ్చినా ఎవ్వరినైనా విమర్శించినా , ఎక్కడైనా పేర్లు వాడినా ఈ సినిమాని కాదు కదా ఫ్యూచర్ లో ఒచ్చే సినిమాలని కూడా తొక్కేస్తారు మీడియా జనాలు. ఆ బ్యానర్ , ఆ డైరెక్టర్ , ఆ హీరో , ఆ వర్గం వీరందరినీ మనసులో నోట్ చేసుకుని ఎక్కడ తొక్కలో అక్కడ తొక్కుతారు.
ఎందుకంటే ఒకప్పటిలాగా లేదు ఇప్పుడు జర్నలిజం పరిస్థితి. అడ్డదారులు తొక్కడం , బ్లాక్ మెయిల్ రాజకీయాలు ఒక మాఫియా లాగా తయారు అయ్యింది మీడియా. కానీ ఆ విషయం ఎవరైనా బయటకి అంటే మీడియా ఉలిక్కి పడుతుంది. అలా చెప్పడానికి ఒప్పుకోదు. అప్పట్లో రణ్ అనే సినిమా తీసి తన గట్స్ తో అదంతా బయటపెట్టాడు డైరెక్టర్ రామ్ గోపాల్ వర్మ. అమితాబ్ బచ్చన్ - సుదీప్ ప్రధాన పాత్రలు చేసిన ఆ సినిమా అప్పట్లో బాలీవుడ్ లో హిట్ అయినా తెలుగులో , తమిళ్ లో , కన్నడ లో పెద్దగా ఆడలేదు. ఆ సినిమాలో మీడియా చేసే అరాచకాలు, ఎవరిని ఏ రకంగా తోక్కేస్తున్నారు అన్నీ చూపించాడు వర్మ.
పబ్లిసిటీ కోసం మీడియా ఎంత మేరకి దిగజారిపోతుంది అనేది కళ్ళకి కట్టాడు. ఆ సినిమా తరవాత వర్మ రేంజ్ లో ఎవ్వరూ సాహసం చెయ్యలేకపోయారు. ఇప్పుడు ఇన్నేళ్ళ తరవాత అంటే ఒక దశాబ్ద కాలం తరవాత మళ్ళీ మీడియా కి వ్యతిరేకంగా " మనలో ఒకడు " అనే సినిమా సిద్దం అవుతోంది. ఆర్పీ పట్నాయక్ హీరోగా ఆయనే డైరెక్ట్ చేసిన ఈ సినిమా మీడియా ని టార్గెట్ చేస్తూ సాగాబోతోంది. ట్రైలర్ విడుదల అయిన కొన్ని గంటల్లోనే వేలాది లైక్స్ ని పొందింది. బ్రోకర్ సినిమా తో మంచి పేరుతెచ్చుకున్న ఆర్పీ ఆ సినిమాని కమర్శియల్ గా ఆడించుకోలేక పోయాడు. దానికి ప్రధాన కారణంగా పబ్లిసిటీ అని చెప్పాలి. బ్రోకర్ సినిమాకి మౌత్ టాక్ తప్ప సినిమాకి ప్రమోషన్ లేదు , సినిమా వెళ్ళిపోయిన తరవాత చాలా మంది యూ ట్యూబ్ లో చూడడం తప్ప డైరెక్ట్ గా ఎవ్వరికీ ఈ సినిమా థియేటర్ లో చూసిన ఎక్స్ పీరియన్స్ లేదు. అందుకే ఈ సారి పక్కాగా పకడ్బందీ గా ' బ్రోకర్ ' డైరెక్టర్ నుంచి వస్తున్న చిత్రం అంటూ ' మనలో ఒకడు ' ప్రోమోట్ చేస్తున్నాడు ఆర్పీ.
మీడియా కి యాంటీ గా సినిమా తీస్తూ స్వయంగా మీడియా టైకూన్ రామోజీ రావు చేతుల మీదగా ఈ సినిమా టీజర్ లాంచ్ చేయించాడు అంటే మనోడు ధైర్యం చూడండి మరి. ఈ సినిమాలో విలన్ గా సాయి కుమార్ సాగుతూ ఉండగా, ఒక సామాన్య వ్యక్తిగా ఆర్పీ కనిపిస్తాడు. డైరెక్టర్ గా హిట్టు కొట్టాలి అని పట్టు వదలని విక్రమార్కుడిలా ఆర్పీ పట్నాయక్ తన ప్రయత్నాలు యేవో తాను చేస్తున్నాడు మరి.
