మెగా పవర్ స్టార్ రామ్ చరణ్ నటించిన ‘నాయక్’ సినిమాకు మంచి మాస్ ట్యూన్స్ అందించి ఆ సినిమా ఘన విజయంలో ప్రధాన పాత్ర పోషించిన సంగీత దర్శకుడు తమన్ ను ఏరికోరి చెర్రీ - కృష్ణవంశీల కాంబినేషన్లో తీస్తున్న ‘గోవిందుడు అందరి వాడేలే' కోసం సంగీత దర్శకుడిగా ఎంచుకున్నారు. ఇప్పటికే ఈ సినిమా షూటింగ్ ఒక షెడ్యూల్ కూడ పూర్తి అయింది. త్వరలోనే రెండవ షెడ్యూల్ కు ఈ సినిమా రెడీ అవుతోంది.
ఇటువంటి టైంలో సంగీత దర్శకుడు తమన్ ను ఈ సినిమా నుండి తప్పించడం షాకింగ్ న్యూస్ గా మారింది. ఈ సినిమాకు తమన్ స్థానంలో ఇళయరాజా తనయుడు యువన్ శంకర్ రాజాను మ్యూజిక్ డైరెక్టర్‌గా తీసుకున్నట్లు తెలుస్తోంది. అయితే ఈ మార్పుకు గల కారణం తమన్ వ్యవహార శైలి అని అంటున్నారు.
గత రెండు నెలలుగా ఈ సినిమా కోసం తమన్ వినిపిస్తున్న పాటల ట్యూన్స్ అటు చరణ్ కు కాని ఇటు దర్శకుడు కృష్ణ వంశీకి కాని ఏమీ నచ్చడం లేదట. పల్లెటూరి వాతావరణం నేపధ్యంలో నిర్మింపబడుతున్న ఈ సినిమా పాటలకు వెరైటీ ట్యూన్స్ ఇమ్మని కృష్ణవంశీ కోరినా అవి ఏవి పట్టించుకోకుండా తన మాస్ బీట్ తరహాలో పాటలను కంపోజ్ చేస్తూ ఉండటంతో విసిగి పోయిన కృష్ణవంశీ చరణ్ అంగీకారంతో ఈ సంచలన నిర్ణయం తీసుకున్నాడు అనే వార్తలు వస్తున్నాయి.
ఇప్పటికే తమన్ అందిస్తున్న పాటలు తన గత సినిమాలలోని ట్యూన్స్ ను పోలి ఉంటున్నాయని కామెంట్స్ వస్తున్న నేపధ్యంలో ఇంత భారీ సినిమా నుండి తప్పించడం తమన్ కు షాకింగ్ న్యూసే అనుకోవాలి..
