అయితే ఇక్కడ ప్రజా హృదయాలను చీల్చేసే ఘటన ముఖ్యమంత్రికి ఒక క్యాంప్ ఆఫీసు ఉంది. ఎందుకంటే తెలంగాణాకు ఆంధ్ర ప్రదేశ్ లాగా కొత్త రాజధాని అవసరం లేదు.  భవనాలు సరిపడా ఉన్నాయి. దానికి తోడు ఆంధ్ర ప్రదేశ్ ప్రభుత్వం ఖాళీ చేసి వెళ్ళిన భవనాల సంఖ్య తో పాలనకు కావలసిన సదుపాయాలు రెండింతలయ్యాయి. 

మనకు అద్భుతమైన సచివాలయం ఉంది. రాజశెఖర రెడ్డి వంటివారు నిర్మించిన ముఖ్యమంత్రి నివాస సదుపాయాలతో కూడిన కాంప్ కార్యాలయముంది. ఉమ్మడి తెలుగు రాష్ట్రంలో వై.ఎస్. రాజశేఖరరెడ్డి ముఖ్యమంత్రిగా ఉన్న సమయంలో ఇద్దరు మంత్రుల క్వార్టర్లను పడగొట్టి సీఎం నివాసం, క్యాంప్ కాంప్ కార్యాలయం నిర్మించారు. అప్పట్లో ప్రధాన మీడియా దీనిపై పెద్ద వివాదమే లేవదీసింది. దీనికి నాటి ముఖ్యమంత్రి వివరణ ఇచ్చారు. ఇది తన సొంతనివాసం కాదని, సీఎం ఎవరువచ్చినా ఇక్కడే నివాసం ఉండి కాంప్ కార్యాలయాన్ని ఉపయోగించు కుంటారని అన్నారు. 

ఈ నూతన భవన నిర్మాణానికి దాని ఖర్చుకు ఏమైనా శాస్త్రీయత  ఉందా?  అంటే ముఖ్యమంత్రి గారి చిత్తానికి నచ్చకపోవటమే ఇందులో ఇమిడి ఉన్న శాస్త్రీయత.  ఏవో కాకమ్మ కబుర్లు చెప్పటం తప్ప, వేరే ఇతర కారణాలు ఏమీ కనిపించవు.  ప్రజలు తాము స్వేదం చిందించిన సంపాదించిన సొమ్ము నుంచి "పన్నుల రూపంలో చెల్లించిన డబ్బు" ను ప్రభుత్వాధినేతల పదవీ వ్యామోహానికి, అధికార దర్పానికి, ఆర్భాటాలకు ఇష్టారాజ్యంగా ప్రజాధనాన్ని కష్టార్జితాన్ని ఖర్చుచేయటం, ఎంతవరకు న్యాయం?  ప్రజాసంపదల పరిరక్షకుడుగా సంరక్షకుడుగా కెసిఆర్ ప్రజలకు చేసిన మేళ్ళేమిటి?

ఈ ప్రణాలికా కాలం తరవాత ఎన్నికలు జరిగి కెసిఆర్ స్థానంలో, మరో కొత్త ముఖ్యమంత్రి వస్తే  ఆయన కూడా వాస్తుకు అను గుణంగా మరో క్యాంప్ ఆఫీసు,  మరో సచివాలయం ఆయనకు నచ్చిన వాస్తు పండితుని సలహా ప్రకారం కట్టుకుంటానంటే ఎలా? ప్రజల సొమ్మును లెక్ఖా పత్రం ఉండదా? జవాబుదారీ ఉండదా? జాతికి రక్షకులుగా ఉండాల్సిన వాళ్ళే ఇలా అనవసర ఖర్చులు పెడితే వారిని ప్రజాసేవకులని ఎలా అనగలం? 

"సచివాలయానికి బైసన్-పోలో గ్రౌండ్ - ఏమాత్రం ఆమోదయోగ్యంకాదని" ఇప్పటికే ఆ ప్రాంతంలో ట్రాఫిక్ — జామ్ ల కారణం గా పరిస్థితులు దారుణంగా ఉంటున్నాయని, అక్కడ సచివాలయం కడితే పరిస్థితి మరింత దయనీయంగా దారుణంగా తయారౌతుందని అధికార వర్గాలు, ప్రజా సంఘాలు, విపక్షాలు వ్యాఖ్యానిస్తున్నాయి.

Bison Polo Grounds

తొలుత ఒక కుక్కని చంపాలంటే దానికి "పిచ్చి ఉందని, అది పిచ్చికుక్క" అని ప్రచారం చేసి దాన్ని చపేసే వైనం లాగానే - ప్రస్తుత సచివాలయానికి వాస్తు దోషమో? శాపమో?  ఉందని దానిపై తొలుత ప్రచారం చేసిన ముఖ్యమంత్రి, తర్వాత జనం లోని ఆగ్రహావేశాలు చూసి - అగ్ని ప్రమాదాల అంశాన్ని యవనిక పైకి తెచ్చి, ప్రస్తుత సచివాలయం పాలనకు యోగ్యం కాదని ముద్ర వేసే ప్రయత్నం చేశారు.