తెలంగాణలో సమగ్ర సర్వే దేశం ఆశ్చర్యపడేలా జరిగిందని సీఎం కేసీఆర్ ప్రకటించారు. ఈ సర్వేతో ఎన్నో వాస్తవాలు బయటపడతాయని అన్నారు. సర్వేకు ఊహించని రీతిలో జనం సహకరించారన్న విజయవంతం చేసిన అందరికీ కృతజ్ఞతలు తెలిపారు. సర్వేను ప్రజలు స్వాగతించారని.. ఎన్యుమరేటర్లకు బాగా సహకరించారని ఆయన వివరించారు. అద్భుతంగా ఈ కార్యం పూర్తి చేసిన ఉద్యోగులు, గణకులను ఆయన ప్రసంశించారు. చాలాచోట్ల సర్వే 80-90 శాతానికి పైగా పూర్తయిందన్నారు. అవసరాన్ని బట్టి సర్వేను పొడిగించాలా వద్దా అనేది నిర్ణయిస్తామన్నారు.
చంద్రబాబు, జూనియర్ ఎన్టీఆర్ వంటి వారు సైతం సర్వేలో నమోదు చేసుకున్నారని కేసీఆర్ మెచ్చుకున్నారు. ఈ సర్వేపై దేశవ్యాప్తంగా చర్చ జరుగుతోందన్నారు. ముందు ముందు దాదాపు అన్ని రాష్ట్రాలు తమ సర్వేను అనుసరిస్తాయని కేసీఆర్ ధీమా వ్యక్తం చేశారు. భారత ప్రభుత్వం సైతం ఈ సర్వేను అనుసరించినా ఆశ్చర్యపోనవసరం లేదని చంద్రశేఖర్ రావు అన్నారు. భద్రాచలం ముంపు మండలాల్లో సర్వే జరగలేదని.. ఆ ప్రాంతాలు ఆంధ్రాలో కలసిపోయాయని.. వాటిపై చర్చ అనవసరమని సీఎం కేసీఆర్ తొలిసారి మీడియా ముందు అంగీకరించారు.
సర్వేను విమర్శించిన రాజకీయ నాయకుల గురించి మాట్లాడిన కేసీఆర్.. వారు తమ పరువును తామే తీసుకున్నారని వ్యాఖ్యానించారు. ఈ సర్వే ద్వారా హైదరాబాద్ జనాభా కోటీ 20 లక్షలు మించిపోతుందన్నారు కేసీఆర్.. మొత్తం తెలంగాణ జనాభా ఇప్పటివరకూ మూడున్నరకోట్ల వరకూ ఉంటుందని అనుకున్నామని.. ఇప్పుడు ఈ జనాభా నాలుగున్నరకోట్ల వరకూ వెళ్తోందని వివరించారు. ఈ సర్వే ఆధారంగా ప్రజలు మరిన్ని మేలైన కార్యక్రమాలు రూపొందిస్తామని కేసీఆర్ ప్రజలకు భరోసా ఇచ్చారు. తెలంగాణ సమాజం ఇదే స్ఫూర్తిని చూపి తనకు సహకరిస్తే.. త్వరలోనే బంగారు తెలంగాణ కలను సాకారం చేసి చూపుతానని కె. చంద్రశేఖర్ రావు అన్నారు
